ვირუსი არსად წასულა, ვირუსი არავის დაუმარცხებია, ვირუსს ცალკე აღებული სახელმწიფო ვერ დაამარცხებს, ეს არის გლობალური კრიზისი, – ამის შესახებ პრემიერ-მინისტრმა, გიორგი გახარიამ ქვეყანაში კორონავირუსით ინფიცირების ზრდასთან დაკავშირებით განაცხადა.
„ჩვენ ყოველთვის ვამბობდით, რომ ეკონომიკური საქმიანობის გახსნასთან ერთად ქვეყანაში გაიზრდებოდა მობილობა, რასაც შესაძლოა, რომ მოჰყოლოდა ინფიცირებულების რაოდენობის ზრდა. რა თქმა უნდა, ჩვენ ამასთან ერთად ვამბობდით, რომ ჩვენ უნდა ვისწავლოთ ინფიცირების შემთხვევების გამოვლენა, მათი სწრაფი მკურნალობა და შემდგომ ნორმალურ ეკონომიკურ ცხოვრებაში დაბრუნება. ეს არის ის, რასაც ჩვენ ვეძახით ადაპტაციას.
ვირუსი არსად წასულა, ვირუსი არავის დაუმარცხებია, ვირუსს ცალკე აღებული სახელმწიფო ვერ დაამარცხებს, ეს არის გლობალური კრიზისი, მაგრამ ჩვენ უნდა ვისწავლოთ ვირუსის მართვა, ჩვენ უნდა ვისწავლოთ როგორ ვუმკურნალოთ ჩვენს მოქალაქეებს, როგორ გამოვიძიოთ და მივაკვლიოთ პირველწყაროს და ეს არის ის ყველაზე დიდი ამოცანა, რომელიც ჩვენ უნდა გადავლახოთ ისე, როგორც აქამდე წარმატებულად მოვედით, მაგრამ ამასთან ერთად ყველას უნდა გვესმოდეს, რომ პასუხისმგებლობა თითოეულ მოქალაქეზე, ყველაზეა გადანაწილებული”, – განაცხადა გახარიამ.
