ამერიკელი სენატორი, ვიეტნამის ომის გმირი ჯონ მაკკეინი 81 წლის ასაკში გარდაიცვალა. როგორც მისი ოჯახის მიერ გავრცელებულ მოკლე განცხადებაშია აღნიშნული, ჯონ მაკკეინი შაბათს დაიღუპა.
სენატორი 2017 წლის ივლისიდან უმძიმეს დაავადებას – ტვინის სიმსივნეს ებრძოდა და იმ პერიოდიდან მოყოლებული მკურნალობის კურსს გადიოდა.
ოჯახის ინფორმაციით, სენატორმა მისივე გადაწყვეტილებით, პარასკევიდან მკურნალობა შეწყვიტა.
ჯონ მაკკეინი 1987 წლიდან დღემდე არიზონას შტატის სენატორი იყო. 2008 წლის აშშ-ის საპრეზიდენტო არჩევნებში ის “რესპუბლიკური” პარტიის საპრეზიდენტო კანდიდატი იყო. 1958 წელს ჯონ მაკკეინმა საზღვაო აკადემია დაამთავრა. ამის შემდეგ იგი გახდა საზღვაო ფლოტის მფრინავი. მონაწილეობდა ვიეტნამის ომში. ვიეტნამის ომის დროს 1967 წლის ოქტომბერში ჰანოის დაბომბვის დროს მისი თვითმფრინავი ჩამოაგდეს, რის შემდეგაც მან 5,5 წელი მძევლობაში გაატარა, სადაც სერიოზულ წამებას გაუძლო.
,,ქართველი ხალხისა და პირადად ჩემი სახელით გამოვთქვამ გულწრფელ სამძიმარს სენატორი ჯონ მაკკეინის გარდაცვალების გამო. ქართველმა ხალხმა დაკარგა დიდი მეგობარი, რომელიც ყოველთვის გვერდში ედგა ჩვენს ქვეყანას, – ამის შესახებ საქართველოს პრეზიდენტის, გიორგი მარგველაშვილის სამძიმრის წერილშია ნათქვამი.
საქართველოს პირველი პირი ხაზს უსვამს, რომ ჯონ მაკკეინი საქართველოს ეროვნული გმირია და მის ღვაწლს ქართველი ხალხი არასოდეს დაივიწყებს.
