„ეროვნული უშიშროების საბჭოს გადაწყვეტილებით, შეიარაღებული ძალების რაოდენობა უცვლელი რჩება,” – ამის შესახებ უშიშროების საბჭოს მდივანმა დავით რაქვიაშვილმა უშიშროების საბჭოს სხდომის დასრულების შემდეგ ჟურნალისტებს განუცხადა. მისივე თქმით, 2019 წელს შეიარაღებული ძალების რაოდენობა ისევ 37 000 იქნება. მისივე ინფორმაციით, უშიშროების საბჭო სავარაუდოდ ბოლოჯერ შეიკრიბა.
„ვიმსჯელეთ უშიშროების საბჭოს კონსტიტუციურ ვალდებულებაზე – ეს არის შეიარაღებული ძალების რიცხოვნობის დადგენა. ამასთან დაკავშირებით გადაწყვეტილება მიღებულია. შეიარაღებული ძალების რაოდენობა რჩება უცვლელი. ეს არის 37 000. ვიმსჯელეთ შეიარაღებულ ძალებში მიმდინარე რეფორმებზე, მათ შორის განათლების მიმართულებით, რეზერვის სისტემის განვითარების მიმართულებით. თავდაცვის მინისტრმა ასევე წარმოადგინა შესყიდვების მხრივ გრძელვადიანი ხედვა და ასევე ვისაუბრეთ ტოტალური თავდაცვის კონცეფციასა და ეროვნული მედეგობის გაზრდის შესაძლებლობებზე.
ეს, ალბათ, უშიშროების საბჭოს ბოლო სხდომაა. იმედია არაფერი ისეთი არ მოხდება ქვეყანაში, რომელიც იძულებულს გაგვხდის, რომ უშიშროების საბჭოს სხდომა იქნეს მოწვეული,”- განაცხადა რაქვიაშვილმა.