რუსთავის „აზოტიდან“ გათავისუფლებული მუშების საქმეზე თბილისის სააპელაციო სასამართლო გადაწყვეტილებას ხვალ გამოაცხადებს. ამის შესხებ tv4-ს აზოტიდან გათავისუფლებული მუშების ადვოკატმა თამარ სურმავამ განუცხადა. მისივე თქმით, სასამართლომ დღეს მოისმინა მხარეების მტკიცებულებები და პოზიციები.
როგორც ცნობილია, რუსთავის აზოტთან პროფკავშირების ხმაურიანი დავა უკვე წელიწადზე მეტია გრძელდება.
რუსთავის საქალაქო სასამართლომ რამდენიმე თვის წინ სრულად დააკმაყოფილა პროფკავშირების მოთხოვნები და „აზოტს“ გათავისუფლებული 56 თანამშრომლის სამსახურში აღდგენა და შრომითი განაცდურის ანაზღაურება დაავალა.
პირველი ინსტანციის გადაწყვეტილება რუსთავის აზოტმა სააპელაციო სასამართლოში გაასაჩივრა და საქალაქო სასამართლოს გადაწყვეტილების ბათილად ცნობა მოითხოვა.
„რუსთავის აზოტის“ ადმინისტრაციამ 330 ზე მეტი დასაქმებული სამსახურიდან 2017 წლის 25 იანვარს წინასწარი გაფრთხილების გარეშე გაათავისუფლა.
საწარმოს ადმინისტრაციის გადაწყვეტილებას მუშების პროტესტი მოჰყვა,მუშები რამდენიმე თვის განმავლობაში ითხოვდნენ სამსახურებში აღდგენას, თუმცა უშედეგოდ. კომპანიამ მათ 400 ლარიანი კომპენსაციები შესთავაზა, დასაქმებულების დიდი ნაწილი შეთავაზებას დათანხმდა, მხოლოდ 56 –მა ადამიანმა მიმართა საკუთარი შრომით უფლებების დასაცავად სასამართლოს.
ფოტო არქივი.
