უკრაინაში, კიევის ოლქში სამართალდამცველებმა ყაჩაღობაში ეჭვმიტანილი უცხოელებისგან შემდგარი კრიმინალური დაჯგუფება დააკავეს. ამის შესახებ ინფორმაციას უკრაინის ნაციონალური პოლიციის კიევის ოლქის მთავარი სამმართველოს უფროსი ანდრეი ნებიტოვი ავრცელებს.
დაჯგუფების წევრები ქართველები არიან, რადგან უკრაინის პოლიციის ცნობით, ჩატარებული სპეცოპერაციის შედეგად უცხო ქვეყნის მოქალაქეების დაკავების შესახებ ინფორმირებულია საქართველოს საელჩო. დაკავებული ქართველების შესახებ ინფორმაციას ადასტურებს საგარეო საქმეთა სამინისტრო.
დაკავებულები ადგილობრივი მცხოვრების სახლზე შეიარაღებული თავდასხმისთვის რამდენიმე დღის განმავლობაში იძებნებოდნენ. სპეცოპერაციის ჩატარების დროს ისინი შეიარაღებულები იყვნენ.
ამასთან, როგორც კიევის ოლქის პოლიციის პრესსამსახური იტყობინება, სამი ნიღბიანი მამაკაცი ბორისპოლის რაიონის ერთ-ერთ სოფელში კერძო მეწარმის სახლს თავს დაესხა, სახლის მეპატრონეები დააბეს და ძვირფასეულობა და ფული წაიღეს.
სამართალდამცველებმა თავდამსხმელები კიევი-ბორისპოლის ავტომაგისტრალზე დააკავეს. პოლიციის ცნობით, ისინი აეროპორტისკენ მიემართებოდნენ და სამშობლოში გაფრენას გეგმავდნენ. დაკავებულთა ასაკი 33, 41 და 45 წელია. მათ უკრაინაში ბინადრობის უფლება ჰქონდათ.
სპეცოპერაციის შედეგად დაკავებულების საცხოვრებელ მისამართზე ჩხრეკისას ამოღებულია ცეცხლსასროლი იარაღი და ხელყუმბარები.
