Update: ვითომ კაცები და მაგარი ბიჭები, როგორც ჩანს, ასე წყვეტენ საქართველოში ბიზნესის საქმეებს, – ამის შესახებ ჟურნალისტებს ყიფშიძის ქუჩაზე დაჭრილი ერთ-ერთი მამაკაცის მეუღლემ, მარიკა წერეთელმა განუცხადა.
„პირდაპირ მივმართავ კრიმინალებს, ეს ამბავი უნდა დამთავრდეს ერთხელ და სამუდამოდ საქართველოში. მე დღეს მომკლეს ჩემს ქმართან ერთად. ბოლომდე ვიბრძოლებ, რათა ეს ყველაფერი დამთავრდეს საქართველოში. მგონი კადრები ყველამ ნახეთ. არ ვიცნობ არავის, ვინც იყვნენ იქ. ერთადერთი ჩემი ფიქრი და გონება ის არის, გავიგო ჩემი მეუღლის მდგომარეობა და ველოდები. მე, როგორც ქალი, მოქალაქე, დედა, ვპირდები, პირდაპირ მივმართავ, მიყურებენ ალბათ ის კრიმინალები, არ ვაპატიებ. ამით წერტილი უნდა დაესვას საქართველოში ასეთ სიტუაციას, როცა დღისით, მზისით ადამიანს ქუჩაში ვერ გაუვლია“, – განაცხადა ერთ-ერთი დაჭრილი მამაკაცის მეუღლემ.
ვაკე-საბურთალოს პოლიციის სამმართველოს პირველი განყოფილებაში ყიფშიძის ქუჩაზე ორი ადამიანის დაჭრასთან დაკავშირებით, მოწმეების გამოკითხვა მიმდინარეობს.
შსს-ს ინფორმაციით, იმის გათვალისწინებით, რომ საგამოძიებო მოქმედებები ჯერ კიდევ მიმდინარეობს, ვერ აკონკრეტებენ, თუ რამდენი მოწმე იკითხება.
შეგახსენებთ, ყიფშიძის ქუჩაზე, ორი ადამიანი დღეს დაჭრეს. ერთის მდგომარეობა შედარებით მძიმეა, მეორე კი მსუბუქადაა დაჭრილი.
მომხდარზე გამოძიება სისხლის სამართლის კოდექსის 19-108 მუხლითაა დაწყებული, რაც განზრახ მკვლელობის მცდელობას გულისხმობს.
