ადვოკატ ნაირა ოტიაშვილის დაკავებასთან დაკავშირებით, შსს ოფიციალურ ინფორმაციას ავრცელებს. როგორც უწყების განცხადებაშია ნათქვამი, ადვოკატთან ერთად ცრუ დასმენის ბრალდებით ორი პირი, დედა-შვილია დაკავებული .
დანაშაული 4-დან 6 წლამდე ვადით თავისუფლების აღკვეთას ითვალისწინებს.
“გამოძიებით დადგინდა, რომ ცრუ დასმენა განხორციელდა მიმდინარე წლის აპრილში დაწყებულ სისხლის სამართლის საქმეზე, რომელიც ნათესავებს შორის ქონებრივი დავის საფუძველზე წარმოქმნილ ოჯახში ძალადობას ეხებოდა. კერძოდ, ბრალდებულებმა – ს.ბ.-მ და მ.ა.-მ გამოძიებას ცრუ ჩვენება მისცეს და მათივე ოჯახის წევრი ძალადობასა და შემაკავებელი ორდერის პირობების დარღვევაში დაადანაშაულეს. აღნიშნული ფაქტი კი დაადასტურა მათმა ადვოკატმა – ნ.ო.-მ .
გამოძიება ანგარებით ან სხვა პირადი მოტივით ჩადენილ ცრუ დასმენის ფაქტზე, საქართველოს სსკ-ის 373-ე მუხლის მე-3 ნაწილის “ა” ქვეპუნქტით მიმდინარეობს,”- აღნიშნულია უწყების განცხადებაში.
