სტრასბურგში, დღეიდან ექვსი თვის განმავლობაში, ქართული ანბანით გაფორმებული ტრამვაი იმოძრავებს. აღნიშნული საქართველოსთვის ევროპის საბჭოს თავმჯდომარეობის გადაბარებას ეძღვნება.
სპეციალური ტრამვაით, რომელზეც ქართული ანბანი და ევროპის საბჭოს საქართველოს თავმჯდომარეობის ლოგო არის დატანილი, თავმჯდომარეობის ოფიციალურად გადაბარებამდე, დღეს ევროპის საბჭოს სასამართლო შენობიდან საქართველოს საგარეო საქმეთა მინისტრი დავით ზალკალიანი და ევროპის საბჭოს წევრი ქვეყნების მუდმივი წარმომადგენლები იმგზავრებენ.
ასევე, სტრასბურგის რესპუბლიკის მოედანზე საქართველოს, როგორც თავმჯდომარე ქვეყნის, დროშის აღმართვის ცერემონია საქართველოს საგარეო საქმეთა მინისტრის, სტრასბურგის მერიის, ევროპის საბჭოს გენერალური მდივნისა და ევროპის საბჭოში საფრანგეთის მუდმივი წარმომადგენლის მონაწილეობით გაიმართება.
ცერემონიის ფარგლებში სიმბოლური ლენტი გაიჭრება და საქართველოს ეროვნული ჰიმნი შესრულდება .
საქართველოს საფრანგეთის მხრიდან დღეს ევროპის საბჭოს თავმჯდომარეობის სიმბოლური გასაღები გადაეცემა. საქართველოს საგარეო საქმეთა მინისტრ დავით ზალკალიანს, როგორც ევროპის საბჭოს მომავალ თავმჯდომარეს, სიმბოლურ გასაღებს საფრანგეთის ევროპულ საქმეთა სახელმწიფო მინისტრი – ამელი დე მონშალენი გადასცემს.
საქართველო ევროპის საბჭოს მინისტრთა კომიტეტის თავმჯდომარე ქვეყანა დღეიდან 2020 წლის 15 მაისის ჩათვლით იქნება.
ამასთან, საქართველო სტრასბურგის საშობაო ბაზრობაში მონაწილეობს. ევროპის საბჭოს მინისტრთა კომიტეტის საქართველოს თავმჯდომარეობასთან დაკავშირებით, სტრასბურგის საშობაო ბაზრობაზე ქართული კოტეჯი გაიხსნა.
