ელექტროშოკი, პნევმატური იარაღი, ბასრი საგნები და აზარტული სათამაშო საშუალებები- 6 თვეში სკოლებში 17 ათასზე მეტი დარღვევა დაფიქსირდა.
2019 წლის აპრილი-ივნისისა და სექტემბერ-ნოემბრის (12 ნოემბრის ჩათვლით) პერიოდში, საჯარო სკოლებში საგანმანათლებლო დაწესებულების მანდატურის სამსახურმა 17 739 დარღვევა/სავარაუდო დარღვევა გამოავლინა. ხოლო აპრილი-ივნისსა და სექტემბრიდან 23 დეკემბრის ჩათვლით პერიოდში 5346 უკონტაქტო ზედაპირული დათვალიერება განხორციელდა.
უკონტაქტო ზედაპირული დათვალიერების შედეგად მანდატურებმა სკოლებში ამოიღეს 19 ბლაგვი საგანი, 637 თამბაქოს ნაწარმი/სანთებელა/ასანთი; 42 ბანქო ან სხვა აზარტული სათამაშო საშუალება, 18 საახალწლო ასაფეთქებელი ან მომწამვლელი ნივთიერება; 1 ელექტროშოკი; 1 პნევმატური იარაღი; 29 ბასრი საგანი და 17 სხვა აკრძალული ნივთი.
აღსანიშნავია,რომ ზედაპირული დათვალიერება უმტესად თბილისისა და ქვემო ქართლის რეგიონის საჯარო სკოლებში ჩატარდა, რადგაც , მანდატურის სამსახურის ცნობით, აღნიშნულ რეგიოონებში სამსახური რაოდენობრივად ყველაზე მეტ საჯარო სკოლას ემსახურება.
რაც შეეხება უშუალოდ დისციპლინური დარღვევის ტიპებს, როგორც გამოთხოვილ საჯარო ინფორმაციაშია ნათქვამი, 2019 წლის აპრილი-ივნისისა და 2019 წლის სექტემბერი – 23 დეკემბრის ჩათვლით პერიოდში სკოლებში:აზარტული თამაშების 102 შემთხვევა დაფიქსირდა.მანდატურის სამსახურმა 1228 აკრძალული ნივთი ამოიღო.დაფიქსირდა 68 ასაფეთქებლის გამოყენების ფაქტი.მანდატურებმა აღმოაჩინეს თამბაქოს მოხმარების 552 შემთხვევა.სხეულის დაზიანების კი 37 შემთხვევა იყო.
როგორც მანდატურის სამსახურში ამბობენ, სტატისტიკური მონაცემების მომატება წინა წელთან შედარებით განპირობებულია იმით, რომ 2019 წლის განმავლობაში მანდატურები დამატებით 130 საჯარო სკოლაში შევიდნენ, რამაც ბუნებრივად გამოიწვია დარღვევების ფაქტების გამოვლენა.
