გრიპის ვირუსით კლინიკებში მიმართვიანობა გაზრდილია, თუმცა გასული წლის ანალოგიურ პერიოდთან შედარებით, ჰოსპიტალიზაციის და გართულებული შემთხვევების მაჩვენებელი განახევრებულია.
დაავადებათა კონტროლის ეროვნული ცენტრის ხელმძღვანელის, ამირან გამყრელიძის განმარტებით, უწყებას გრიპის ვირუსით დაავადებულთა შესახებ დეტალური ინფორმაცია ხვალ ექნება. როგორც დაავადებათა კონტროლის ეროვნული ცენტრის ხელმძღვანელი ირწმუნება, ქვეყანა შორს არის ეპიდემიური აფეთქებისგან.
„ხვალ გვექნება სტატისტიკა, ამ კვირის შემაჯამებელი მონაცემები. რამდენადაც მე წინასწარი ინფორმაცია მაქვს, არ არის მნიშვნელოვანი ზრდა, მაგრამ დაზუსტებული სტატისტიკა იქნება ორშაბათს. ჩვენ დღეს ვმსჯელობთ ერთი კვირის წინანდელი სტატისტიკით, რომლის დინამიკაც გახლავთ ბოლო სამი კვირის განმავლობაში მიმართვიანობის ზრდა, მაგრამ მძიმე შემთხვევების მაჩვენებელი, სადაც ჰოსპიტალიზაციაა საჭირო, იქ პირიქით, შარშანდელ ანალოგიურ პერიოდთან შედარებით განახევრებულია“, – განმარტა ამირან გამყრელიძემ.
გამყრელიძის თქმით, ქვეყანაში ძირითადად B ტიპის ვირუსი ცირკულირებს, რომლიც შედარებით მსუბუქია და საშუალო სიმძიმით მიმდინარეობს. დაავადებათა კონტროლის ეროვნული ცენტრის ხელმძღვანელი ირწმუნება, რომ სამედიცინო სექტორი მზად არის პაციენტთა გაზრდილი ნაკადის მისაღებად. მისივე თქმით, ქვეყანაში გრიპის სეზონი კიდევ დაახლოებით, სამი თვე გაგრძელდება, ამიტომ უწყების ხელმძღვანელი მოქალაქეებს აცრისკენ მოუწოდებს.
რაც შეეხება გრიპის სიმპტომებს, მედიკოსები განმარტავენ, გრიპის სიმპტომებია ხველა, მაღალი სიცხე, და სახსრების ტკივილი.
გრიპის ვირუსისგან თავის დასაცავად მთავარია ხელის ხშირი დაბანა და ოთახის განიავება.
