მარნეულის ყოფილი მერი თემურ აბაზოვი რუსთავის საქალაქო სასამართლომ გაამართლა. დღევანდელ სასამართლო სხდომაზე გამამართლებელი განაჩენი დადგა თემურ აბაზოვთან ერთად ბრალდებული სამი პირის მიმართაც.
მარნეულის ყოფილი მერის უფლებადამცველის, გაგი მოსიაშვილის განცხადებით, ბრალდებულებს გამამართლებელი განაჩენის გამოცხადების შემდეგ, გირაოს თანხები უკან დაუბრუნდებათ.
შეგახსენებთ, მარნეულში მოქალაქე ელჩინ ალახვერდიევის მიმართ განხორციელებული დამამცირებელი და არაადამიანური მოპყრობის ფაქტზე პროკურატურამ მარნეულის ყოფილი მერი, თემურ აბაზოვი 2018 წლის 13 ივნისს დააკავა. ამავე მოქალაქის ცემის ფაქტზე, სისხლის სამართლებრივი დევნა დაიწყო საქართველოს პარლამენტის წევრის, პარტია „ერთიანი ნაციონალური მოძრაობიდან“ აზერ სულეიმანოვის, მარნეულის მუნიციპალიტეტის საკრებულოს წევრის, პარტია „ქართული ოცნებიდან“ რამინ ალახვერდიევის და მარნეულის მერის ნათესავის, მოქალაქე გულიევის მიმართ.
თემურ აბაზოვს რუსთავის საქალაქო სასამართლომ აღკვეთის ღონისძიების სახით პატიმრობა 2018 წლის 14 ივნისს შეუფარდა, 2018 წლის 13 დეკემბერს კი აბაზოვი გირაოს სანაცვლოდ სასამართლო დარბაზიდან გათავისუფლდა.
სისხლის სამართლის საქმეზე აბაზოვს ბრალი სსკ-ის 144.3-ე მუხლის მეორე ნაწილის „ა“ ქვეპუნქტით და 25, 157.1 მუხლის პირველი და მეორე ნაწილებით ჰქონდა წარდგენილი. ხოლო ამავე საქმეზე ბრალდებულებს რამინ ალახვერდიევს, აზერ სულეიმანოვს და ე. გულიევს ბრალად სსკ-ის 126-ე მუხლის პირველი ნაწილის „ბ“ ქვეპუნქტით ედავებოდნენ.
სოციალურ ქსელში საქმესთან დაკავშირებით გავრცელდა ვიდეო, სადაც მარნეულში მცხოვრები პირი დამამცირებელ გარემოებებში ბოდიშს იხდის „ქართული ოცნების“ თავმჯდომარე ბიძინა ივანიშვილისა და მარნეულის მერის თემურ აბაზოვის სიტყვიერი შეურაცხყოფისთვის.
