თბილისში ბებიისა და დედის მკვლელობის ბრალდებით დაკავებულ 19 წლის ახალგაზრდას ოჯახში კონფლიქტი არ ჰქონია და მან მკვლელობის შესახებ პოლიციას თავად შეატყობინა-ამის შესახებ ჟურნალისტებს ოჯახის მეზობლებმა განუცხადეს.
როგორც ცნობილი ხდება, ოჯახი დაახლოებით 7 წელია ზოზიაშვილის ქუჩაზე ცხოვრობს და კონფლიქტის მსგავსი არაფერი შეუმჩნევიათ.
მეზობლების ცნობით, ბინა ოჯახს არ ეკუთვნის და მისი მეპატრონე ამერიკაშია წასული.
„მეპატრონე ამერიკაში ცხოვრობს და სახლი ოჯახს დაუტოვა, რადგან შეეცოდა ესენი, სოფლიდან იყვნენ ჩამოსული, ქირასაც არ იხდიდნენ. ხმაური არ გამიგია, ეძინათ თურმე. ნორმალური ბავშვი იყო. სამი ადამიანი ცხოვრობდა სახლში, დედა, ბებია და თვითონ. პოლიციაში თავად დაურეკავს”, – აცხადებს ერთ-ერთი მეზობელი.
შეგახსენებთ, თბილისში 19 წლის ბიჭმა დედა და ბებია მოკლა. შსს-ს ინფორმაციით, გამოძიებით დადგინდა, რომ ბრალდებულმა ბებია – 1946 წელს დაბადებული ზ.დ. და დედა – 1974 წელს დაბადებული თ.ზ., მათსავე საცხოვრებელ სახლში, წარსულში არსებული კონფლიქტის ნიადაგზე, მძინარე მდგომარეობაში ნაჯახით მოკლა.
