22 მაისს კომენდანტის საათი საღამოს მხოლოდ 3 საათი გაგრძელდება და 23 მაისის დადგომისთანავე, 00:00 წუთიდან მოიხსნება. ინფორმაციას მთავრობის პრესსამსახური ადასტურებს.
ვინაიდან პარლამენტს საგანგებო მდგომარეობა 22 მაისის ჩათვლით ჰქონდა გამოცხადებული, კომენდანტის საათის შეზღუდვაც სწორედ 22 მაისის დასრულებამდე გაგრძელდება და არა ისე, როგორც აქამდე, დილის 6 საათამდე.
მთავრობის გადაწყვეტილებით, კომენდანტის საათი კორონავირუსის პრევენციის მიზნით 31 მარტიდან მოქმედებს და მისი დარღვევა ფიზიკური პირების 3 ათასი ლარით დაჯარიმებას ითვალისწინებს.
შეგახსნეებთ იმ შეზღუდვებს, რომლებიც ამ დრომდე მთავრობის გადაწყვეტილებით მოიხსნა.
- 11 მაისიდან გაიხსნა ჩაკეტილი თბილისი;
- 11 მაისიდანვე, ქვეყნის მასშტაბით გაიხსნა ყველა სახის წარმოება და ყველა სახის საცალო და საბითუმო მაღაზია, რომელსაც აქვს შესასვლელი ქუჩიდან. შეზღუდვები კვლავ ეხება ტანსაცმლის/ფეხსაცმლის მაღაზიებსა და სავაჭრო მოლებს;
- აღდგა სარეკრეაციო ზონების ფუნქციონირება;
- ისევ მუშაობს ავტოსამრეცხაოები/ავტოსერვისები;
- უკვე შესაძლებელია კომპიუტერის, პირადი და საყოფაცხოვრებო საქონლის რემონტი;
- დაშვებულია სამშენებლო მასალების წარმოება, მშენებლობა და სამშენებლო ზედამხედველობასთან დაკავშირებული საქმიანობა.
- დასაშვები გახდა მსუბუქი ავტომობილებით გადაადგილება და ტაქსების ოპერირება;
- ამოქმედდა ონლაინ ვაჭრობა;
- შესაძლებელი გახდა ნებისმიერ პროდუქტზე მიტანის სერვისით სარგებლობა;
- გაიხსნა ღია ტიპის აგრარული ბაზრების ნაწილი;
- 14 მაისიდან გაიხსნა მოძრაობა რუსთავსა და გარდაბანში;
- 18 მაისიდან გაიხსნა სილამაზის სალონები და ესთეტიკური ცენტრები;
- 18 მაისიდან მოიხსნა 3 ადამიანზე მეტის შეკრების შეზღუდვა ღია და დახურულ სივრცეებში;
- მარნეულში საკარანტინე ზონა მოიხსნა
ეპიდემიოლოგიური ვითარების გათვალისწინებით უახლოეს დროში იგეგმება ქალაქი ბოლნისის და სოფელ რაჭისუბანის გახსნაც. ასევე, მთავრობა, ეპიდემიოლოგიური შედეგების მიხედვით, გეგმავს თეთრიწყაროს რაიონული ცენტრის გახსნას.
