თუ ხელისუფლება გიორგი რურუას არ გაათავისუფლებს, “ევროპული საქართველო” საკონსტიტუციო ცვლილებების მეორე და მესამე მოსმენაში მინაწილეობას არ მიიღებს. ამის შესახებ „ევროპული საქართველოს” ლიდერმა, დავით ბაქრაძემ განაცხადა.
„მთავარი საფრთხე, რაც უკავშირდებოდა კანონპროექტის პირველი მოსმენით ჩაგდებას, უკვე თავიდან არის აცილებული და ახლა ბურთი და პასუხისმგებლობა არის მთლიანად ხელისუფლების მხარეს. თუ ხელისუფლება შეასრულებს 8 მარტის შეთანხმებას და გამოუშვებს გიორგი რურუას, ჩვენ მონაწილეობას მივიღებთ შემდეგ მოსმენებშიც და ეს იქნება არა მხოლოდ საკონსტიტუციო ცვლილება, არამედ ცვლილება, რომელიც ასახავს პოლიტიკური ოპოზიციის თანხმობასაც. თუ ხელისუფლება ამას არ გააკეთებს მათ მოუწევთ ამ ცვლილებების მიღება უჩვენოდ. მიღება აუცილებლად მოუწევთ, რადგან მესამე მოსმენით პროცედურულად პრაქტიკულად ვეღარ ჩააგდებენ. მაგრამ ეს იქნება ცვლილება, რომელიც არ ასახავს ქვეყანაში პილიტიკური ოპოზიციის მხარდაჭერას და შესაბამისად, პასუხისმგებლობა 8 მარტის შეთანხმების შეუსრულებლობაზე მთლიანად დარჩება ხელისუფლების მხარეს”,- განაცხადა ბაქრაძემ.
ცნობისთვის, პარლამენტში საკონსტრიტუციო ცვლილებებს პირველი მოსმენით მხარი დაუჭირა. კანონპროექტს ხმა 136-მა დეპუტატმა მისცა.
პარლამენტი ხვალ საკონსტიტუციო ცვლილებებს მეორე მოსმენით, მომავალ კვირას კი მესამე მოსმენით უყრის კენჭს.
