ეკონომიკისა და მდგრადი განვითარების სამინისტროს „საქართველოს აეროპორტების გაერთიანების“ დირექტორის, თამარ არჩუაძის განცხადებით, ქვეყანა შიდა და საერთაშორისო ტურიზმის გახსნისთვის ემზადება.
მისი განმარტებით, ქვეყნის საერთაშორისო და ადგილობრივი აეროპორტების მომზადება რეგულარული საჰაერო მიმოსვლის დასაწყებად იმ გაიდლაინების მიხედვით მიმდინარეობს, რომლებიც საავიაციო სფეროსთვის გამოქვეყნდა.
„ვემზადებით პირველი ივლისისთვის. თბილისის საერთაშორისო აეროპორტი რეგულარული საჰაერო მიმოსვლის დასაწყებად პრაქტიკულად მზად არის. მიმდინარეობს ქუთაისის საერთაშორისო აეროპორტისა და „საქართველოს აეროპორტების გაერთიანების“ მართვაში მყოფი შიდა აეროპორტების მომზადება ფრენებისთვის. ყველა აეროპორტში ამჟამად მიმდინარეობს სპეციალური სტიკერებით მონიშვნა, რათა მგზავრებმა შეძლონ დაწესებული მეტრ-ნახევრიანი დისტანციის დაცვა“, – განაცხადა თამარ არჩუაძემ.
თამარ არჩუაძის განმარტებით, მგზავრებს პირბადის ტარება, აეროპორტის გარდა, თვითმფრინავის ბორტზეც მოუწევთ.
„ჩაფრენის აეროპორტში კი, მგზავრებს მოუწევთ იმ ქვეყნის რეგულაციების დაცვა, სადაც გაემგზავრებიან“, – განაცხადა თამარ არჩუაძემ.
შეგახსენებთ, რომ ის აუცილებელი მოთხოვნები და რეკომენდაციები, რომლებიც „კოვიდ-19“-ის გავრცელების პრევენციის მიზნით, რეგულარული საჰაერო მიმოსვლის აღდგენის შემდეგ, როგორც მგზავრებმა, ისე აეროპორტებმა და ავიაკომპანიებმა უნდა დაიცვან უკვე ცნობილია.
