გარდაცვლილი თამარ ბაჩალიაშვილის ოჯახის წევრების მთავარ პროკურორთან შეხვედრა დასრულდა. ბაჩალიაშვილის ოჯახის ადვოკატის, მიხეილ რამიშვილის განცხადებით, მთავარმა პროკურორმა ბრძანა, რომ საქმეზე ერთი ვერსიით მუშაობა არ შეიძლება და ეს მიუღებელია.
ამასთან, როგორც რამიშვილი აცხადებს, საქმეში და ექსპერტიზებში ამერიკის ფედერალური ბიურო ჩაერთვება.
„თუ გავიხსენებთ, თავიდანვე იყო უნდობლობა გამოძიების მიმართ და იყო მოთხოვნა, საქმეში გამოძიების ფედერალური ბიურო ჩართულიყო და ექსპერტიზებში მიეღო მონაწილეობა, საელჩოსაც მივმართეთ, რაზეც გვეუბნებოდნენ, რომ მზაობა იყო, მაგრამ ოფიციალურად ელოდებოდნენ საქმის განხორციელებას.
დღეს, როდესაც შევხვდით პროკურორს და მოადგილეებს, წარმოგვიდგინეს დოკუმენტები და მოსამართლეების განჩინებები იმის თაობაზე, რომ მოთხოვნები გადაგზავნილია და ჩართულობა იქნება, მაგრამ ეს დროსთანაა დაკავშირებული.
არის მზაობა, რომ იქნებიან მოწვეული ადამიანები და მათგან რაც ფეისბუკთან, გუგლთან და ვებსაიტებთანაა დაკავშირებული, ყველაფერზე იქნება სრულად მიღებული ინფორმაცია.
რადგან ყველაფერი ვადებთან და დროსთანაა დაკავშირებული, არ ნიშნავს, რომ შეილება დავწყნარდეთ. არის ბევრი ექსპერტიზა ჩატარებული და ეს არის პორველ რიგში, როგორც კომპიუტერთან და რადგან ჩვენ უნდობლობაზე განვაცხადეთ როგორც კომპიუტერზე, ისევე ავტომობილზე დაჩქარებული წესით მოვითხოვეთ მოძიებული იქნას ისეთი სადიაგნოსტიკო აპარატი, რომელიც გამოიკვლევს, როდის განხორციელდა უკანასკნელად ავტომობილის დაქოქვ-გადაადგილება. ყოველ შემთხვევაში, მოსამართლის განჩინებაა, რომ კითხვებზე იქნას პასუხი გაცემული და რეაგირება იყოს.
რაც შეეხება შსს-ს მიერ გავრცელებულ ინფორმაციას, თითქოს თვითმკვლელობა იყო, ამ საკითხზე დიდხანს ვილაპარაკეთ, მე და ოჯახმა ვუთხარით, რომ ეს არის სწრაფვა იქითკენ, საზოგადოებას ჰქონდეს განცდა, რომ თვითმკვლელობა მოხდა. მთავარმა პროკურორმა ბრძანა, რომ ეს მისაღები არაა და არ შეილება ერთი ვერსიით მუშაობა. დანარჩენი უკვე ექსპერტიზის დასკვნიდან გამომდინარე თუ დასტურდება, მათი პირობა იყო, ორგანიზებულ დანაშაულთან მიმართებით დედატალურად იქნება გამოძიება წარმართული. ყველაფერზე პასუხისგამცემი იქნება ირაკლი შოთაძე“, – განაცხადა რამიშვილმა.
