რუსთავის საჯარო სკოლების სახელმძღვანელოებით უზრუნველყოფა ორშაბათიდან დაიწყება.
რუსთავის საგანმანათლებლო რესურსცენტრს 40 ათასამდე წიგნი უკვე გადაეცა. როგორც რესურსცენტრის ხელმძღვანელი, თამარ ხეჩიკაშვილი აცხადებს ამ დროისთვის წიგნების დახარისხება მიმდინარეობს და ორშაბათიდან სკოლებისთვის სახელმძღვანელოების გადაცემის პროცესი დაიწყება.
თამარ ხეჩიკაშვილის ინფორმაციით, სკოლების წიგნებით უზრუნველყოფის პირველი ეტაპი 3 სექტემბრამდე დასრულდება. მისივე თქმით, სასწავლო პროცესის დაწყებამდე უფასო სახელმძღვანელოებით ყველა მოსწავლე იქნება უზრუნველყოფილი.
“სახელმძღვანელოები უკვე დაახლოებით 40 ათასამდეა შემოსული. 3 სექტემბრამდე სავარაუდოდ, პირველი ეტაპი დასრულდება. ახლა ხდება დახარისხება კლასების მიხედვით და ორშაბათიდან უკვე სკოლებზე გავცემთ სახელმძღვანელოებს, რომ მათაც უკვე მოასწრონ დალაგება თავიანთი მოსწავლეებისთვის და შემდეგ უკვე ხელშეკრულების გაფორმებით გადაცემა. სწავლის დაწყებამდე აუცილებლად იქნება დასრულებული ყველა ეტაპი და ყველა მოსწავლისთვის განკუთვნილი იქნება სახელმძღვანელო,” – განაცხადა რუსთავის საგანმანათლებლო რესურსცენტრის ხელმძღვანელმა, თამარ ხეჩიკაშვილმა.
