ქვემო ქართლში, „დაშბაშის კანიონზე“ უნიკალური ტურისტული ინფრასტრუქტურის მოწყობის სამუშაოები აქტიურ ფაზაშია, ეს არის პირველი კერძო საერთაშორისო ინვესტიცია საქართველოს დაცულ ტერიტორიებზე, – ამის შესახებ ინფორმაციას გარემოს დაცვისა და სოფლის მეურნეობის სამინისტრო ავრცელებს.
მათივე განცხადებით, პროექტის ფარგლებში „დაშბაშის კანიონზე“, თანმდევი ეკოტურისტული ბილიკებით და ვიზიტორთა ცენტრით, 240 მეტრის სიგრძის შუშის ხიდი განთავსდება, დაცული ტერიტორიების მიმდებარე ტერიტორიაზე კი აშენდება სასტუმროები და დამატებითი ტურისტული ინფრასტრუქტურა მოეწყობა.
სამინისტროს ინფორმაციით, რეკორდული საინვესტიციო ღირებულების მქონე პროექტი ხელს შეუწყობს ქვემო ქართლის რეგიონში ტურისტული სერვისების განვითარებას და პოზიტიურად იმოქმედებს როგორც გარემოზე, ასევე ადგილობრივი მოსახლეობის სოციალურ და ეკონომიკურ მდგომარეობაზე.
უწყების ცნობით, 2012 წლიდან დღემდე, ალგეთის ეროვნულ პარკში განხორციელებული ინფრასტრუქტურული პროექტების შედეგად აშენდა თანამედროვე სტანდარტების შესაბამისი ვიზიტორთა ცენტრი, სადაც განთავსდა დაცული ტერიტორიების ადმინისტრაციის ოფისი, საკონფერენციო დარბაზი, საგამოფენო სივრცე და კაფეტერია, ასევე მოეწყო შემეცნებით-გასართობი ატრაქცია „თოკების პარკი“, რომელიც ორ ასაკობრივ ზონადაა დაყოფილი და სხვადასხვა დაბრკოლებებს მოიცავს.
