შატილში მომხდარი ავტოკატასტროფის შედეგად დაშავებული სამი პაციენტის ჯანმრთელობის მდგომარეობა მძიმეა, ორ მათგანს ამ დროისთვის ,ოპერაცია უტარდება. ამის შესახებ პირველი საუნივერსიტეტო კლინიკის დირექტორმა, ლევან რატიანმა ჟურნალისტებს განუცხადა.
“გუშინ შემოყვანილია 3 მდედრობითი სქესის პირი, გადმოყვანილია ავარიის ადგილიდან, მათი მდგომარეობა ამ ეტაპზე არის კრიტიკული. 2 მათგანის მდგომარეობა განსაკუთრებით, აღენიშნათ უარყოფითი დინამიკა, განვითარდა შიდა სისხლდენა და სასწრაფო წესით შეყვანილ იქნენ საოპერაციო ბლოკში და მიმდინარეობს ოპერაცია. ერთი მათგანის მდგომარეობა, მესამე ქალბატონის, ამ ეტაპზე შედარებით სტაბილურია,” – თქვა ლევან რატიანმა.
ექიმის განცხადებით, ამ ეტაპზე სამივე დაშავებულთან სიცოცხლესთან შეუსაბამო ტრავმებია.
შეგახსენებთ, რომ 23 აგვისტოს ჟინვალი-ბარისახო-შატილის საავტომობილო გზის 64-ე კილომეტრზე სამგზავრო მიკროავტობუსი, დაახლოებით, 80 მეტრის სიმაღლიდან კლდოვან ფერდობზე გადავარდა. მომხდარის შედეგად, 17 ადამიანი გარდაიცვალა. მძიმედ დაშავდა 3 მოქალაქე, რომლებიც პირველ საუნივერსიტეტო კლინიკაში გადაიყვანეს, ორი მათგანი რეანიმაციაშია მოთავსებული.
შინაგან საქმეთა სამინისტრომ მომხდარ ფაქტზე გამოძიება საქართველოს სსკ-ის 276-ე მუხლით დაიწყო.
