საქართველო გახლავთ ნატო-ს ერთ-ერთი ყველაზე მნიშვნელოვანი პარტნიორი. ჩვენ მჭიდრო პოლიტიკური პარტნიორობა და ძლიერი პრაქტიკული თანამშრომლობა გვაკავშირებს, – ამის შესახებ ჩრდილოატლანტიკური ალიანსის გენერალურმა მდივანმა, იენს სტოლტენბერგმა საქართველოს პრეზიდენტ სალომეს ზურაბიშვილთან შეხვედრის შემდეგ გამართულ ერთობლივ პრესკონფერენციაზე განაცხადა.
მისივე თქმით, საქართველოს პრეზიდენტის, სალომე ზურაბიშვილის ნატო-ს შტაბ-ბინაში მორიგი სტუმრობა საქართველოსა და ნატო-ს შორის მჭიდრო თანამშრომლობას ადასტურებს.
„ქალბატონო პრეზიდენტო, ძვირფასო სალომე, მოგესალმებით კიდევ ერთხელ ნატო-ს შტაბ-ბინაში, სასიამოვნოა თქვენი ხილვა და თქვენი აქ დასწრება კიდევ ერთხელ აჩვენებს საქართველოსა და ნატო-ს შორის მჭიდრო თანამშრომლობისა.
საქართველო გახლავთ ნატო-ს ერთ-ერთი ყველაზე მნიშვნელოვანი პარტნიორი. ჩვენ მჭიდრო პოლიტიკური პარტნიორობა და ძლიერი პრაქტიკული თანამშრომლობა გვაკავშირებს. გამოწვევების, კოვიდ-19-ის პანდემიის მიუხედავად, ნატო და საქართველო აგრძელებენ ჩვენი პარტნიორობის გაძლიერებას და ნატო-საქართველოს კომისიის დღევანდელ შეხვედრას, ჩვენს მიღწევებს მაქსიმალურად გამოვიყენებთ და შევაფასებთ, რისი გაკეთება შეგვიძლია შემდგომში. გასულ წელს ნატო-საქართველოს არსებითი პაკეტი გავაფართოვეთ, რაც ეხმარება საქართველოს, გაატაროს რეფორმები, გააძლიეროს თანამშრომლობა მოკავშირეებთან და გააგრძელოს წვლილის შეტანა ერთობლივ უსაფრთხოებაში.
ჩვენი ძირითადი პრიორიტეტები მოიცავს უსაფრთხო კომუნიკაციას. პრეზიდენტმა და მე შეხვედრაზე განვიხილეთ ტრენინგები და წვრთნები, საზღვაო მხარდაჭერის გაძლიერება. დღეს ჩვენ ასევე შევეხეთ უსაფრთხოებას შავი ზღვის რეგიონში და რუსეთის მიერ სამხედრო მშენებლობის გაგრძელებას. ნატო მხარს უჭერს საქართველოს ტერიტორიულ მთლიანობას და სუვერენიტეტს მის საერთაშორისოდ აღიარებულ საზღვრებში, ჩვენ ვაგრძელებთ მოწოდებას რუსეთის მიმართ, გამოიწვიოს სამხრეთ ოსეთისა და აფხაზეთის აღიარება და გამოიყვანოს ჯარები“, – განაცხადა იენს სტოლტენბერგმა.
ნატო-ს გენერალური მდივანი სტრასბურგის სასამართლოს გადაწყვეტილებასაც შეეხო.
„ადამიანის უფლებათა სასამართლოს დავესესხები, რომლის გადაწყვეტილებაშიც წერია, რომ რუსეთი დადანაშაულებულია ადამიანის უფლებების დარღვევაში სამხრეთ ოსეთსა და აფხაზეთში. ეს მხოლოდ აძლიერებს ჩვენს მოწოდებას რუსეთის მიმართ, შეესაბამებოდეს საერთაშორისო სამართალს და პატივი სცეს საქართველოს ტერიტორიულ მთლიანობას.
შეხვედრაზე ასევე განვიხილეთ პროგრესი, რომელსაც საქართველო ახორციელებს რეფორმების სფეროში. ეს არის გადამწყვეტი, რადგან პროგრესი რეფორმირების კუთხით უფრო გვაახლოებს ერთიან მიზანთან, ნატო-ს წევრობასთან. ჩვენ დღეს მივმართეთ ასევე მხარდამჭერ მისიას ავღანეთში. საქართველო ხანგრძლივი დროის განმავლობაში ერთ-ერთი ყველაზე დიდი კონტრიბუტორი იყო ნატო-ს მისიაში. ჩვენ ვაფასებთ საქართველოს სამხედროების პროფესიონალიზმს და იმ მსხვერპლს, რომელიც თქვენ გაიღეთ. ძალიან დიდი მადლობა, ქალბატონო პრეზიდენტო, რომ დღეს აქ იმყოფებით, თქვენი ვალდებულებისთვის ნატო-სა და ჩვენი პარტნიორობისათვის. ნატო-ს პარტნიორობა საქართველოსთან ყველას უფრო უსაფრთხოს და დაცულს ხდის“, – განაცხადა ნატო-ს გენერალურმა მდივანმა.
