„აბა, ქურდებს შეაგინე“, „ქურდები არ გიყვარს ბიჭო“ – დაახლოებით ამ სტანდარტზეა პროკურატურა გადასული, – ამის შესახებ „ლეიბორისტული პარტიის“ ლიდერმა, შალვა ნათელაშვილმა განაცხადა.
ნათელაშვილი პროკურატურის განცხადებას გამოეხმაურა, რომ უწყება მზადყოფნას გამოთქვამს, ნიკა მელიას მიერ გირაოს გადახდის შემთხვევაში, სასამართლოს პატიმრობის გირაოთი შეცვლის შუამდგომლობით მიმართოს.
მისი თქმით, შედის იმ პროკურორების მდგომარეობაში, რომლებიც შემდეგ პასუხს აგებენ და ნიკა მელიას საკანს დაიკავებენ უკანონობისთვის.
„ბევრ სფეროში გამიგია აფიორა, მაგრამ ამ დონის საპროკურორო აფიორა პირველად გავიგე, რომ რაც საპროცესო კოდექსში არ არის გათვალისწინებული, უკანონობას სთავაზობენ. დაახლოებით მსჯელობები იყო ხოლმე – „აბა, ქურდებს შეაგინე“, ან „ქურდები არ გიყვარს ბიჭო“, დაახლოებით ამ სტანდარტზეა პროკურატურა გადასული. რა გირაო უნდა გადაიხადოს, კაცი გამოვიდა ანტისაოკუპაციო მიტინგზე და მოითხოვდა უცხო ჩექმის გასვლას საქართველოდან და ამის გამო დაიჭირეს. ახლა გირაოს სთხოვენ, არ ყოფილა მსოფლიო იურისპრუდენციაში ასეთი მარაზმი და მე შევდივარ იმ პროკურორების მდგომარეობაში რომლებიც მერე პასუხს აგებენ და მელიას საკანს დაიკავებენ ამ უკანონობისთვის. ბოლშევიკების დროს ატარებდა რეპრესიებს ვინც, კი გასაგებია რომ ის ეჟოვი და იაგოდა დახვრიტეს, რადგან მინისტრები იყვნენ და მეტი პასუხისმგებლობა ჰქონდათ, მაგრამ მერე ჩამოყვნენ და მოსამართლეს, პროკურორებს მუსრი გაავლეს თვითონ კომუნისტებმა. არავის არ უყვარს ბინძური საქმეების გამკეთებელი პროკურორები და მოსამართლეები და თვითონვე უსწორდებიან და ეს წიგნი მაინც წაიკითხონ და მოვლენ ჭკუაზე“, – განაცხადა ნათელაშვილმა.
ჟურნალისტის კითხვის პასუხად, ნათელაშვილმა აღნიშნა, მისი განცხადება არ არის პროკურორებისადმი მუქარა. მისივე თქმით, ნიკა მელიამ გირაო არ უნდა გადაიხადოს.
„რა თქმა უნდა, გირაო არ უნდა გადაიხადო. მე პირადად, როგორც მეგობარსა და თანამებრძოლს ვურჩევდი, არავითარი გირაო არ გადაიხადოს და არც ნიკას არ მოუვა თავში ეგეთი აზრი, რადგან პროფესიონალი იურისტია და ძალიან კარგად იცის, რომ საპროკურორო თაღლითობებსა და აფიორებში არ უნდა გაეხვეს ამხელა სიმაღლიდან რაზეც ის ავიდა. იგივე რეიტინგული და სხვა მდგომარეობით არის ეს ხალხი მოსული აქ, მათ შორის, ნიკას გასათავისუფლებლად. აქ ერთ-ერთი მთავარი მოთხოვნა ჩვენი ეს არის.
ხელისუფლება ძალიან მალე, რამდენიმე დღეში იქნება იძულებული, გაათავისუფლოს ნიკა მელია ყოველგვარი პირობების გარეშე, რადგან მათი ქონებრივი უსაფრთხოება მთავრდება. ამერიკის შეერთებული შტატების ფინანსთა სამინისტროს უცხოური აქტივების სამმართველოში ივანიშვილის, გომელაურისა და ღარიბაშვილის საბანკო ანგარიშები მალე გაიყინება და შეიძლება, ერთი ნაყინის ფულიც აღარ დარჩეთ ცხელ გულზე“, – განაცხადა ნათელაშვილმა.
