გარემოსდაცვითი ზედამხედველობის დეპარტამენტის მიერ გამოქვეყნებული ინფორმაციის თანახმად, 1-ელი მარტიდან გადამფრენ ფრინველებზე ნადირობა აკრძალულია.
გარემოსდაცვითი ზედამხედველობის დეპარტამენტის შესაბამისი სამსახურების თანამშრომლები კონტროლს მთელი საქართველოს მასშტაბით გაამკაცრებენ.
“აკრძალულ პერიოდში ნადირობის შემთხვევაში, პირს შესაბამისი საჯარიმო სანქციის გადახდა მოუწევს.
რიგ შემთხვევებში მოხდება მოპოვებული ობიექტისა და სანადირო იარაღის კონფისკაცია; ასევე, შესაძლებელია, პირს სანადირო ცეცხლსასროლი იარაღის ტარების უფლება ჩამოერთვას.
ფრინველის უკანონოდ მოპოვების შემთხვევაში, საჯარიმო თანხას გარემოსთვის მიყენებული ზიანის თანხა ემატება. თუ მოპოვებული ნანადირევით გარემოს მნიშვნელოვანი ზიანი მიადგა, პირის მიმართ სისხლის სამართლის პასუხისმგებლობის საკითხი განიხილება,” -აღნიშნავენ უწყებაში.
გარემოსდაცვითი ზედამხედველობის დეპარტამენტი ნადირობის მოყვარულებს კანონისა და დაწესებული ვადების დაცვისკენ მოუწოდებს.
ნადირობის სეზონი მიმდინარე წლის აგვისტოში გაიხსნება.
