“ქართული ოცნების” თავმჯდომარე ირაკლი კობახიძე ევროკავშირის მედიაციით მიმდინარე მოლაპარაკებების შეთანხმების გარეშე დასრულების შემდეგ აცხადებს, რომ ოპოზიციის თვითმიზანი შეთანხმების არმიღწევა იყო.
კობახიძემ აღნიშნა, რომ ოპოზიციამ შეხვედრაზე ულტიმატუმები დააყენა, რაც მისი თქმით, კანონის უზენაესობის ფეხქვეშ გათელვას ითვალისწინებდა.
“ვიცით, რომ არის ოპოზიციური სექტორი, ერთი ორი გამონაკლისის გარეშე, იმართება კიევიდან კონკრეტული პოლიტიკოსის, მიხეილ სააკაშვილის მხრიდან. შესაბამისად, ასეთ ვითარებაში მათ შეთანხმებაზე წამოსვლის არავითარი რესურსი არ ჰქონდათ. ეს იყო მთავარი მიზეზი, რატომაც მათ ჩაშალეს საბოლოო ჯამში შეთანხმება. თქვენ ნახეთ მათი გაღიზიანებული სახეები და რიტორიკა, ყველამ დაინახა ის, რომ ჩამშლელი იყო ოპოზიცია. ეს არის მათი გაღიზიანების მიზეზი. ყველა პუნქტი, გარდა ერთისა და ეს პუნქტი იყო პარლამენტში შესვლა, რაც დაგვამადლეს; იყო ის პუნქტები, რაც ითვალისწინებდა „ქართული ოცნების“ მიერ რაღაცების გაკეთებას, ანუ ჩვენი პუნქტები იყო. ერთადერთი პუნქტი იყო დამადლებული შემოსვლა პარლამენტში. კონკრეტიკაზე ვერ ვსაუბრობთ, რადგან პროცესი დღეს არ დასრულებულა. შეიძლება გაგრძელდეს ეს პროცესი, ვნახოთ! ბუნებრივია, ყველაფერს გავაკეთებთ იმისთვის, რომ საბოლოოდ პროცესი კონსტრუქციულ რეჟიმში წარიმართოს“, – განაცხადა კობახიძემ და დასძინა, რომ „ამ ხალხის, სააკაშვილის, ბოკერიას და სხვების მიზანია, რომ წააგოს სახელმწიფომ“. „მათ შორის, კონკრეტული ულტიმატუმებითაც გამოჩნდა ის, რომ სახელმწიფოს წაგება არის მათი მიზანი. ბუნებრივია, ჩვენ ამას ვერ დავუშვებდით და ეს ყველამ დაინახა“, – განაცხადა კობახიძემ.
