კოლექტიურმა სერგი კაპანაძეებმა, „ნაციონალური მოძრაობის“ სახით, პირველად ჩვენი ჯარისკაცი და საამაყო ჯარი მაშინ ჩააგდეს დიდ საფრთხეში, როდესაც რუსეთისგან მიმდინარე პროვოკაცია 2008 წლის აგვისტოში თავიდან არ და ვერ აიცილეს, – ამის შესახებ საქართველოს კულტურის მინისტრმა, თეა წულუკიანმა განაცხადა.
როგორც თეა წულუკიანმა აღნიშნა, ყველას ახსოვს, რომ ჯარისკაცები, რომლებიც ჩვენი ქვეყნის ტერიტორიულ მთლიანობას იცავდნენ, ბრძოლის ველზე მიატოვეს და გაიქცნენ.
„ჩვენ გვახსოვს, რომ რუსეთის წინააღმდეგ სტრასბურგის სასამართლოში შეტანილი დავა ცარიელი ფურცლები და ნაწერი აღმოჩნდა. იუსტიციის სამინისტროში, რომელსაც რვა წლის განმავლობაში ვხელმძღვანელობდი, იუსტიციის გუნდთან, პროკურატურასთან, თავდაცვასთან და სხვა ძალოვან უწყებებთან ერთად, მრავალი წლის მერე მოგვიწია ნაწილ-ნაწილ მტკიცებულებების შეგროვება. ჩვენი ქართველი ჯარისკაცისა და ჩვენი ჯარის, სახელმწიფოს, სამშობლოს სიმართლე დავამტკიცეთ რამდენიმე თვის წინ სტრასბურგის სასამართლოში, სადაც რუსეთს დავა პირწმინდად მოვუგეთ. რუსეთის ნარატივი ჩვენ წინააღმდეგ ყოველთვის იყო ხოლმე, თითქოს ჩვენმა ჯარმა კასეტური ბომბები და სხვა იარაღი გამოიყენა, რათა ცხინვალი დაებომბა. ჩვენ ეს ნარატივი, გეგმა მთლიანად ჩავუშალეთ რუსეთის ფედერაციას სტრასბურგის სასამართლოში, მიუხედავად იმისა, რომ ძალიან ხშირად რუსეთი საქართველოს წინააღმდეგ იყენებდა სწორედ სერგი კაპანაძეების, ბათუ ქუთელიების და სხვების უპასუხისმგებლო განცხადებებს, ტყუილს ქართველი ჯარისკაცის წინააღმდეგ. მე მახსენდება ასევე საქართველოს პარლამენტში მთავრობის მოსმენები, სადაც სერგი კაპანაძე, ბოკერია და სხვები გამოდიოდნენ და არც კი რცხვენოდათ, ისე აცხადებდნენ, თითქოს იუსტიციის სამინისტრო, ჩემი ხელმძღვანელობით, ქართულ ჯარს არ იცავდა სათანადოდ. სინამდვილეში, მათ არამცთუ მიატოვეს დაღუპული ჩვენი ჯარისკაცები მაშინ აგვისტოში, ბრძოლის ველზე, მტკიცებულებებიც კი არ შეაგროვეს იმისთვის, რომ ჩვენ დავის დაცვა შეგვძლებოდა რუსეთის წინააღმდეგ. „ისკანდერიც“ კი გაიტანეს ქვეყნიდან 2008 წლის აგვისტოში, რომელიც ჩვენ სასიცოცხლოდ გვჭირდებოდა ბევრი წლის შემდეგ რუსეთის წინააღმდეგ. ასეთი სერგი კაპანაძეები დღეს უკვე დაასხდნენ პირდაპირ, უსირცხვილოდ და ყოველგვარი შეფარვის გარეშე რუსულ ნარატივს და ქართულ ჯარს ადანაშაულებენ იმაში, რაც მას არასოდეს ჩაუდენია“, – განაცხადა წულუკიანმა.
