სათხის მონასტრის სარეაბილიტაციო სამუშაოები განახლდა. ინფორმაციას „საყდრისის კომიტეტი“ ავრცელებს. 17 აპრილს „საყდრისის კომიტეტის“ წევრები, მონიტორინგის მიზნით ბოლნისის მუნიციპალიტეტში სათხის მონასტრში (VIII-XI საუკუნე) ჩავიდნენ და მორიგი სარეაბილიტაციო ეტაპის მოსამზადებელი სამუშაოები დაათვალიერეს.
„მიუხედავად პანდემიისა 2020 წელს ძეგლის სარეაბილიტაციო სამუშაოები შეფერხებით, მაგრამ მაინც მიმდინარეობდა, წელს იგეგმება ძირითადი ტაძრის ბზარების სრულად დამუშავება, კონქის გაწმენდა, გაფხვიერებული კირ-დუღაბის გამოწმენდა, გამორეცხვა და თავიდან შევსება, ასევე მარკირებული, ავთენტური ქვების დაბრუნება ტაძრის კედლებზე, ლავგარდანისა (კარნიზი) და სარტყელის მოწყობა“, – აცხადებენ „საყდრისის კომიტეტის“ წევრები.
მათივე ცნობით, VIII-XI საუკუნის სათხის მონასტერს „საყდრისის კომიტეტი“ 2017 წლიდან იცავს და მისი სარეაბილიტაციო სამუშაოები სწორედ „საყდრისის კომიტეტის“ აქტივისტების ინიციატივითა და მონიტორინგით 2018 წლის გაზაფხულიდან მიმდინარეობს.
