ჯანდაცვის მინისტრის მოადგილის, თამარ გაბუნიას განცხადებით, „სინოფარმის“ დიდი ნაწილი, 40 000-მდე დოზა უკვე გამოყენებული ან დაჯავშნილია.
მისივე თქმით, 10 000 დოზა გათვალისწინებულია სტრატეგიული ჯგუფებისთვის. ამასთან, თამარ გაბუნიას ინფორმაციით, ახლო მომავალში „სინოფარმით“ ვაქცინაცია დაიწყება პენიტენციური სისტემის ფარგლებშიც.
„დაახლოებით 10 000 დოზა არის დარეზერვებული სტრატეგიული ჯგუფებისთვის, ესენია პოლიცია, პენიტენციური სისტემა. მოკლე ხანში დაიწყება ვაქცინაცია პენიტენციური სისტემის ფარგლებში. ასევე დაიწყება სტრატეგიული ვაქცინაცია მედიისთვის და ტურიზმის სექტორში დასაქმებული პირებისთვის. ამ ეტაპზე იქნება შედარებით ნაკლები მოცვით, ვინაიდან დარეზერვებული დოზების უდიდესი ნაწილი დასჭირდება პოლიციას და პენიტენციურ სამსახურს“, – განაცხადა თამარ გაბუნიამ.
„ასტრაზენეკას“ მარაგთან დაკავშირებით კი ჯანდაცვის მინისიტრის მოადგილე თამარ გაბუნია ამბობს, რომ ქვეყანაში „ასტრაზენეკას“ გარკვეული დოზების თავისუფალი რაოდენობა ჯერ არის.
„ასტრაზენეკას“მარაგს რაც შეეხება, დამატებით შემოვიდა 43 ათასი დოზა. ვვარაუდობთ, რომ დამატებით დოზებთან ერთად, შესაძლებელია, რომ 8-10 ათასი თავისუფალი ჯავშანი „ასტრაზენეკაზე“ კიდევ გაკეთდეს. გვაქვს მოლოდინი, რომ მალევე დაემატება „ასტრაზენეკას“ დოზები „კოვაქსის“ პლატფორმიდან, რაც მოგვცემს საშუალებას, რომ მეორე დოზა შესრულდეს უკვე ახალჩამოსული პარტიიდან. ასე რომ, „ასტრაზენეკას“ გარკვეული დოზების თავისუფალი რაოდენობა ჯერჯერობით გვაქვს“, – განაცხადა თამარ გაბუნიამ.
