„საარჩევნო კოდექსში” ცვლილებების პროექტით, კენჭისყრის შენობიდან 25 და 100 მეტრის მანძილზე ადამიანთა შეკრების ან ამომრჩეველთა აღრიცხვისთვის ჯარიმა 2000 ლარით განისაზღვრა.
აღსანიშნავია, რომ ამომრჩეველთა აღრიცხვის შესახებ ჩანაწერი არ გვხვდებოდა კანონის ძველ რედაქციაში. კანონის ძველი რედაქცია ითვალისწინებდა მხოლოდ კენჭისყრის შენობაში ან ამ შენობიდან 25 მეტრის მანძილზე ამომრჩევლის გადაადგილების ფიზიკურად შეფერხებას. ახალი რედაქციით, ეს 25- მეტრიანი რადიუსიც იზრდება და დაუშვებელი ხდება როგორც კენჭისყრის შენობაში, ასევე კენჭისყრის შენობიდან 100 მეტრის მანძილზე ამომრჩევლის გადაადგილების ფიზიკურად შეფერხება.
ამავე კანონპროექტით, გაფართოვდა საჯარო მოსამსახურეების წრე, რომელსაც შეკრებებისა და სამუშაო საათების განმავლობაში წინასაარჩევნო კამპანიაში ჩართვის უფლება არ აქვს. უფრო კონკრეტულად, სამუშაო საათებში წინასაარჩევნო კამპანიაში ჩართვა სკოლამდელი აღზრდის დაწესებულებების თანამშრომლებს აეკრძალებათ.
„საარჩევნო კოდექსში” შესატანი ცვლილებები დღეს პარლამენტის იურიდიულ საკითხთა კომიტეტმა განიხილა. მომავალ კვირას კი პროექტს პარლამენტის პლენარულ სხდომაზე გაიტანენ.
შეგახსენებთ, საარჩევნო რეფორმას შარლ მიშელის დოკუმენტი ითვალისწინებს.
