მუნიციპალური განვითარების ფონდის დაფინანსებით, სოფელ ქვეშის საჯარო სკოლის შენობის კაპიტალური რეაბილიტაცია მიმდინარეობს. სამუშაოების ფარგლებში, შშმ პირებისთვის განკუთვნილი ლიფტი და საკანალიზაციო ქსელის ბიოლოგიური გამწმენდი სისტემა დამონტაჟდა. ინფორმაციას ბოლნისის მუნიციპალიტეტის მერია ავრცელებს.
მათივე ცნობით, შენობაში ასევე გათბობის სისტემა, სკოლის ეზოში კი სპორტული მოედანიც მოეწყობა. ინფრასტრუქტურული პროექტის სატენდერო ღირებულება 1 100 000 ლარს შეადგენს.
სკოლაში მიმდინარე სამუშაოებს ადგილზე ბოლნისის მერი დავით შერაზადიშვილი, შესაბამისი სამსახურების წარმომადგენლებთან ერთად გაეცნო.
ამასთან, როგორც მუნიციპალიტეტის მერიამ გაავრცელა ინფორმაცია, ქვეშის გარდა, მუნიციპალური განვითარების ფონდის დაფინანსებით, რეაბილიტაცია ქალაქ ბოლნისის N1 საჯარო სკოლის შენობაშიც მიმდინარეობს.
აღსანიშნავია, რომ 2020 წელს ფონდმა ბოლნისის მუნიციპალიტეტში, სოფელ ზვარეთში 60 ბავშვზე გათვლილი სკოლა ააშენა.
”დღეს სოფელ ქვეშის საჯარო სკოლაში მიმდინარე ინფრასტრუქტურული სამუშაოები მოვინახულეთ. სკოლას კაპიტალური რეაბილიტაცია პირველად უტარდება, ეს ისტორიული პროექტი ოქტომბერში დასრულდება და მისი სატენდერო ღირებულება 1 100 000 ლარს შეადგენს. სამუშაოების ფარგლებში შენობაში ასევე გათბობის სიტემა დამონტაჟდება და ეზოში სპორტული მოედანიც მოეწყობა. აღსანიშნავია, რომ მუნიციპალური განვითარების ფონდის დაფინანსებით ქვეშის გარდა წელს რეაბილიტაცია ქ. ბოლნისის N1 საჯარო სკოლაშიც მიმდინარეობს. მოხარული ვარ, რომ მალე ჩვენი მოსწავლეები ევროპული სტანდარტების მქონე, თანამედროვე სკოლებში გააგრძელებენ სწავლას“, – განაცხადა ბოლნისის მუნიციპალიტეტის მერმა დავით შერაზადიშვილმა.
