ქვეყანაში გართულებული ეპიდვითარების ფონზე, კლინიკებში თავისუფალი საწოლების დეფიციტია. როგორც ჯანმრთელობის ეროვნული სააგენტოს ქვემო ქართლის რეგიონული სამსახურის კოორდინატორმა, თეა ბაკაშვილმა TV4-ს განუცხადა, კლინიკებში საწოლფონდის კუთხით რესურსი ამოწურულია და თავისუფალი ადგილები თითქმის აღარ დარჩა.
ქვემო ქართლის რეგიონის მასშტაბით, ამ დროისთვის, მხოლოდ 30 თავისუფალი საწოლია. კერძოდ, 20 თავისუფალი საწოლია მარნეულის მუნიციპალიტეტის ბავშვთა პედიატრიულ განყოფილებაში და 10 საწოლი თეთრიწყაროს მუნიციპალიტეტებში.
თეა ბაკაშვილის თქმით, დამატებითი რესურსების მობილიზებაზე მუშაობა მიმდინარეობს.
ინფორმაციისთვის, ქვემო ქართლის რეგიონში კოვიდპაციენტებისთვის სულ 400 სტაციონარული ადგილია მობილიზებული. ბოლო დღე-ღამეში, ქვემო ქართლში კორონავირუსით ინფიცირების 200 ახალი შემთხვევა გამოვლინდა.
