რუსთავის მუნიციპალიტეტის ბიუჯეტი 31 000 000 ლარით იზრდება და ჯამში ქალაქის ბიუჯეტი 81 მილიონით განისაზღვრება. რუსთავის ახლადარჩეულმა მერმა, ნინო ლაცაბიძემ ქალაქის ბიუჯეტის პარამეტრებზე ისაუბრა, რომელიც მუნიციპალიტეტის საკრებულოს წარედგინება.
როგორც ნინო ლაცაბიძემ განაცხადა, ცენლტრალურ ხელისუფლებასთან ერთად, სხვადასხვა მიმართულებით მუშაობა გაგრძელდება, რომ ქალაქის ბიუჯეტი კიდევ უფრო გაიზარდოს.
“მნიშვნელოვანი ზრდა გვაქვს ბიუჯეტში, რაც ყველაზე მეტად გვახარებს. შეიძლება ვთქვათ, რომ უპრეცედენტოა რუსთავში ბიუჯეტის პროექტი, რომელიც მომზადებულია. რომ შევადაროთ გასულ წელს, რუსთავის ბიუჯეტი დავიწყეთ 50 მილიონით, დღეს პროექტი მომზადებულია 81 მილიონზე ანუ 31 მილიონით იზრდება. მნიშვნელოვანია, რომ ის კიდევ შეიცვლება მთელი წლის განმავლობაში.
ყველაფერს გავაკეთებთ, ცენტრალურ ხელისუფლებასთან ერთად, სხვადასხვა მიმართულებით ვიმუშავებთ, რომ ბიუჯეტი კიდევ უფრო გაიზარდოს და კიდევ უფრო მეტი პროექტის და სერვისის განხორციელების შესაძლებლობა გვქონდეს. თუმცა ეს არსებული ბიუჯეტიც ძალიან ბევრ შესაძლებლობას გვაძლევს, რომელიც გადანაწილებულია სხვადასხვა მიმართულებით.
მაგალითად, სოციალური მიმართულება და ჯანდაცვა რჩება პრიორიტეტად, ჩვენ მაგალითისთვის შეგვიძლია მოვიყვანოთ, რომ ორმაგდება მედიკამენტების დაფინანსება, ორმაგი ოდენობით შეეძლება მოსახლეობას, რომ მედიკამენტებით ისარგებლოს, ოპერაციის ხარჯებზე კიდევ უფრო გაზრდილი იქნება თანადაფინანსება. მნიშვნელოვანია, რომ ვეტერანებისთვის იგივე მედიკამენტები, ოპერაცია აბსოლუტურად არ აქვს მნიშვნელობა სოციალური სტატუსი ექნება თუ არა, მუნიციპალიტეტის მხრიდან ექნება ძალიან მაღალი მხარდაჭერა. ყველა პროექტი ისევ გაგრძელდება, ყველა სერვისი სოციალური და ჯანდაცვის მიმართულებით და დაემატება კიდევ ახალი სერვისები და ამის საშუალებას ეს ბიუჯეტი ნამდვილად იძლევა” – განაცხადა რუსთავის ახლადარჩეულმა მერმა, ნინო ლაცბაიძემ.
