საწარმოთა პრივატიზება და ბიუჯეტის აღნიშნულის შესაბამისად ფორმირება, საგადასახადო შეღავათების გაუქმება და აკუმულირებული თანხების მიზნობრივად გამოყენება – ამ საკითხებზე ფინანსთა მინისტრს, ლაშა ხუციშვილს პარლემენტის წევრმა ალექსანდრე დალაქიშვილმა კითხვით მიმართა.
ფინანსთა მინისტრმა პარლამენტში მომავალი წლის ბიუჯეტის პროექტის გადამუშავებული ვერსია წარადგინა.
“მაინტერესებს თქვენი პოზიცია და მთავრობის მიდგომაც, წამგებიანი საწარმოების პრივატიზებებთან დაკავშირებით. რა თქმა უნდა, თუ მალე მოხდება წამგებიანი საწარმოების გასხვისება, ბიუჯეტს ტვირთად აღარ დააწვება, პირობითად ასეთი მიდგომები. მეორე კითხვა ეხება: ადრე ვსაუბრობდით, საგადასახადო შეღავათების გაუქმებასთან დაკავშირებით. იყო მსჯელობა, რომ განიხილავდა მთავრობა შეღავათების გაუქმებას. ვფიქრობ, ამ შეღავათების გაუქმებით მიღებული ფული უფრო მიზნობრივ ჯგუფებზე გადანაწილდეს. ახლა შეღავათი ეხება მდიდარსაც და ღარიბსაც. ავიღოთ წამალზე დღგ-ს შეღავათი, შეიძლება წამლის ფასი გაძვირდეს, მაგრამ იქიდან მიღებული შემოსავალი უფრო შეჭირვებულ ფენაზე გადავანაწილოთ და მოსახლეობაზე მოხდეს სუბსიდირება, ამ მაგალითის მოყვანა შეიძლება. საინტერესოა თქვენი ხედვა და პოზიცია”- მიმართა ფინანსთა მინისტრს ალექსანდრე დალაქიშვილმა.
“ახლა შეუძლებელია პრივატიცაზია გაკეთდეს მთელი რიგი სახელმწიფო საწარმოებისა, რომლებიც არიან ზარალზე. ამ შემთხვევაში მნიშვნელოვანია ის, რომ დროულად განხორციელდეს შესაბამისი რეფორმები სახელმწიფო საწარმოებში, რაც საშუალებას მოგვცემს, რომ სახელმწიფო საწარმოების დიდი ნაწილის პრივატიზაცია განხორციელდეს და ბუნებრივია, ეს უნდა განხორციელდეს ყველაზე გამჭვირვალე გზით, რაც კი არსებობს პრივატიცაზიის. ამ მიმართულებით ადგილობრივი კაპიტალის ბაზრის განვითარებისთვის დამატებით სტიმული იქნება აღნიშნული რეფორმა.
საგადასახადო შეღავათების გაუქმებას რაც შეეხება, ეს არის ის ერთ-ერთი პრიორიტეტი, რომელზეც ფინანსთა სამინისტრო მუშაობს. შრომატევადი საქმიანობაა, რომ მოხდეს შეფასება კონკრეტული შეღავათის და ეფექტურობის. ვმუშაობთ USAID-თან და საერთაშორისო სავალუტო ფონდთან, გვექნება დოკუმენტის ჩარჩო, რომლის მიხედვითაც მოხდება აღნიშნული შეღავათების შეფასება და რა თქმა უნდა, ვიზიარებ ამ შეკითხვაში არსებულ მოსაზრებას, რომ შეღავათები უნდა იყოს მაქსიმალურად კონკრეტული და მაქსიმალურად მიზნობრივი. არ შეიძლება შეღავათით სარგებლობდეს ყველა ის პირი, რომელიც ამ შეღავათს არ საჭიროებს სახელმწიფოსგან”- განაცხადა ფინანსთა მინისტრმა, ლაშა ხუციშვილმა ალექსანდრე დალაქიშვილის საპასუხოდ.