სადარბაზოში დამონტაჟებული გამწოვი მილები და საფრთხე მოსახლეობისთვის, რომელსაც “სოკარ ჯორჯია გაზისგან” რეაგირება უკვე თვეებია არ მოჰყოლია.
მე-19 მიკრორაიონში, საცხოვრებელი კორპუსების სადარბაზოებში გამწოვი მილებია დამონტაჟებული, რაც უსაფრთხოების ნორმებს ეწინააღმდეგება და ადამიანების სიცოცხლისთვის საფრთხის შემცველია.
კომპანია “სოკარ ჯორჯია გაზში”, რომელიც აღნიშნულის შემოწმებასა და რეაგირებაზეა პასუხისმგებელი, აცხადებენ, რომ შემოწმებები ბოლო ერთი წელია პანდემიის გამო არ ხდება.
მოსახლეობა კი ამბობს, რომ კომპანიის წარმომადგენლები ადგილზე მიდიან, თუმცა ფაქტია, რომ მათ არც გაფრთხილება მიუღიათ და არც კომპანიის მხრიდან არის მიღებული უსაფრთხოების ზომები.
გამწოვი მილების ამ გზით დამონტაჟება, რომ საფრთხის შემცველია, ამას კომპანიის მიერ TV4-ისთვის წერილობით გაცემულ პასუხშიც ვკითხულობთ.
კომპანია ამბობს, რომ მსგავს შემთხვევებზე გაფრთხილებას გასცემენ და გონივრული ვადის ამოწურვის შემდეგ, შესაძლოა მცხოვრებლებისთვის გაზის მიწოდების შეწყვეტაც კი მოხდეს.
“აღნიშნული გზით გამწოვი მილის დამონტაჟება არ შეესაბამება უსაფრთხოების სტანდარტებს.პანდემიის პერიოდში კომპანია ვერ ახერხებდა ყოველწლიურ გეგმიურ გამაფრთხილებელი შემოწმების გაკეთებას, თუმცა უახლოეს მომავალში კვლავ დაიწყება შემოწმებები და რა თქმა უნდა მსგავსი ფაქტის აღმოჩენის შემთხვევაში, კომპანია აბონენტს მისცემს გაფრთხილებას და გონივრულ ვადას დარღვევის ამოსაფრხვევად.თუ გონივრულ ვადაში რეკომენდაცია არ იქნება გათვალისწინებული, კომპანიას აქვს უფლება ასეთ აბონენტს შეუწყვიტოს გაზის მიწოდება. “– გვიპასუხეს “სოკარ ჯორჯია გაზის” პრესსამსახურში.
სოკარი ჯორჯია გაზის ცხელი ხაზია: 16 114
