წამლების გაიაფების პროცესი დავიწყეთ. წამლები საქართველოში უკვე შემოსულია და ხელმისაწვდომია აფთიაქებში – ამის შესახებ პრემიერ-მინისტრმა ირაკლი ღარიბაშვილმა მთავრობის სხდომაზე განაცხადა.
მისი თქმით, უმეტეს შემთხვევაში მედიკამენტებზე ფასები 60-დან 80%-მდე არის შემცირებული.
„წამლების გაიაფების პროცესი დავიწყეთ. ჩვენ გავხსენით თურქეთის ბაზარი იმ დათქმით, რომ მხოლოდ მაღალი სტანდარტის წამლები შემოვიდოდა. მინდა მოსახლეობას ვუთხრა, რომ წამლები საქართველოში უკვე შემოსულია და ხელმისაწვდომია, აფთიაქებში უკვე იყიდება რამდენიმე დასახელების წამალი, ყველაზე მოთხოვნადი წამლები.
მინდა რამდენიმდე მაგალითი მოვუყვანო მოქალაქეებს. დღეს უკვე ყველაზე მოთხოვნადი წამლები რაც არის, მაგალითად, გულ-სისხლძარღვთა დაავადების სამკურნალო მედიკამენტის ფასი თუ იყო 220 ლარი, დღეს მისი ღირებულებაა 48 ლარი. უმეტეს შემთხვევაში 60-დან 80%-მდე არის შემცირებული ფასები წამლებზე. როგორც მინიმუმ ფასები განახევრდა, რაც რა თქმა უნდა, ძალიან გვიხარია.
ათეულობით სხვადასხვა დასახელების მედიკამენტი უკვე რეგისტრაციისთვის არის შეტანილი სამინისტროში, ძალიან მალე დაჩქარდება ეს პროცესი, რათა დროულად მოხდეს ყველა წამლის ჩანაცვლება, მოსახლეობას არჩევანი ჰქონდეს იაფიანი წამლის შესაძენად.“ – აღნიშნავს პრემიერი.
