ვითარება საწვავის ბაზარზე – მთავრობის წევრები, კონკურენციის ეროვნული სააგენტოს ხელმძღვანელთან ერთად, საწვავის დისტრიბუტორებს შეხვდნენ და პრობლემის გადაწყვეტის გზებზე იმსჯელეს.
არის თუ არა შესაძლებელი ფასის კლება? – მხარეებმა ახლო მომავლის პროგნოზები, იაფი წყაროებიდან საწვავით მომარაგებისა და მარჟების მინიმუმამდე დაყვანის შესაძლებლობები განიხილეს.
„ჩვენთვის მნიშვნელოვანია, რომ საწვავის ბაზარზე გვქონდეს სრულფასოვანი, კონკურენტული გარემო და შესაძლებელი იყოს გაძვირებული საწვავის მოსახლეობისთვის მაქსიმალურად იაფ და ხელსაყრელ პირობებში მიწოდება. შექმნილი გეოპოლიტიკური მდგომარეობიდან, საომარი ვითარებიდან გამომდინარე, რომელიც რეგიონშია, სამწუხაროდ, მსოფლიოში ფასები საწვავზე არის ძალიან მაღალი და გვესმის, რომ გლობალურ ტენდენციას საქართველო ვერ აცდება, მაგრამ ჩვენი მიზანია, მაქსიმალური კოორდინაციით მოხდეს იაფი წყაროებიდან საწვავით მომარაგება, ასევე მარჟების მინიმუმამდე დაყვანა იმისთვის, რომ ჩვენს მოსახლეობას მაქსიმალურად ხელსაყრელი პირობებით მივაწოდოთ საწვავი“ -განაცხადა ლევან დავითაშვილმა.
დავითაშვილის თქმით, მცირე ქსელების წარმომადგენლებთან განიხილეს საწვავის ბაზარზე არსებული სიტუაცია და პროგნოზები.
„ვისაუბრეთ იმაზე, თუ რა შეიძლება სახელმწიფომ გააკეთოს კონკურენტუნარიანობის ზრდისთვის, ვისაუბრეთ მოწოდების ალტერნატიულ წყაროებზე, რომლებიც შეიძლება შედარებით უფრო იაფი იყოს, ასევე ხარისხის საკითხებზე და სანდოობაზე“ – აღნიშნა ეკონომიკის მინისტრმა.