რუსთავში, კიდევ ერთი მასშტაბური პროექტის განხორციელება დაიწყო.
პროექტი, ქალაქის შემოსასვლელის სრულ რეაბილიტაციას და თამარ მეფის მოედნიდან სასტუმროს მომდებარე ტერიტორიამდე მოედნების რეკონსტრუქციას ითვალოსწინებს.
რუსთავის მერმა ნინო ლაცაბიძემ, ქალაქის საკრებულოს ფრაქცია ,,ქართული ოცნების’’ წევრებთან, ინფრასტრუქტურის და არქიტექტურის სამსახურებთან ერთად, სამუშაო შეხვედრა გამართა და პროექტის დეტალები კიდევ ერთხელ განიხილა.
პროექტის ფარგლებში, ქალაქის შემოსასვლელში, 70 000 მ2-მდე ფართობზე მოეწყობა მწვანე სივრცე, გარე განათების ქსელი და სარწყავი სისტემა, დაირგვება 1680-მდე სხვადასხვა ჯიშის ხე-მცენარე. ტერიტორიაზე განთავსდება ქალაქის სახელწოდება.
გათვალისწინებულია თამარ მეფის, ჟიული შარტავასა და შოთა რუსთაველის სახელობის მოედნების რეაბილიტაციაც. სავალ ნაწილზე დაიგება ასფალტ-ბეტონის საფარი, მოეწყობა გაბიონები, უსაფრთხოების კუნძულები, დაწნეხილი ბეტონის ბორდიურები, სანიაღვრე ქსელი და რეკრეაციული სივრცე.
სამუშაოები უკვე დაიწყო და 2023 წლის იანვარში უნდა დასრულდეს.
