ენერგეტიკისა და წყალმომარაგების მარეგულირებელ კომისიაში რუსთავის წყალმომარაგების სფეროში შექმნილ სიტუაციაზე იმსჯელეს.
შეხვედრას რუსთავის მერი ნინო ლაცაბიძე,საქართველოს ენერგეტიკისა და წყალმომარაგების კომისიის თავმჯდომარე დავით ნარმანია და კომპანია ,,რუსთავის წყლის” წარმომადგენლები ესწრებოდნენ.
ნინო ლაცაბიძის განცხადებით მზად არიან, კომპანიასთან ერთად, პრობლემის მოგვარებაზე იზრუნონ, რადგან მოსახლეობას არ აინტერესებს ბოდიში მოსახლეობას აინტერესებს ქმედება და აინტერესებს კონკრეტული შედეგი ამ ქმედების.
„ინფრასტრუქტურული პროექტები, რომლებიც ქალაქის განვითარებისთვის ხორციელდება, აზრს კარგავს, თუ მოსახლეობას არ ექნება წყალი. დღეს ძალიან მნიშვნელოვანია რუსთავისთვის და რუსთაველებისთვის ამ საკითხის განხილვა. ახლაც, როდესაც ჩვენ ამ საკითხზე ვმსჯელობთ, ნახევარი ქალაქი არის წყლის გარეშე. წყალი არ გვქონდა თითქმის მთელი ზაფხულის განმავლობაში. ჩვენ ჩვენს თავზე ვიღებთ ნეგატივს, რაც ამ პრობლემიდან არის დაგროვებული. არასდროს გავურბივარ პასუხისმგებლობას. მზად ვართ, კომპანიასთან ერთად, მაქსიმალური ჩართულობით პრობლემის მოგვარებაზე ვიზრუნოთ. რა ინფრასტრუქტურული პროექტიც არ უნდა განვახორციელოთ ქალაქის განვითარებისთვის, არაფერს აზრი არ აქვს, თუ მოსახლეობას არ ექნება წყალი. ეს ზაფხული არის უმძიმესი მთელი რუსთავისთვის. ჩვენ მზად ვართ, ვიმუშაოთ და პრობლემის მოგვარებისთვის ერთხელ და სამუდამოდ ქმედითი ნაბიჯები გადავდგათ. დღევანდელ შეხვედრასაც აზრი არ ექნება, თუ კონკრეტულ გადაწყვეტილებას არ მივიღებთ. აქ ზოგადად საუბარს აზრი არ აქვს, უნდა დაიდოს გეგმა კონკრეტული მისამართებით. გეგმა გაწერილი ვადით. ამ გეგმის შესრულებას კი სემეკ-მა უნდა გაუწიოს მონიტორინგი“, – განაცხადა ნინო ლაცაბიძემ.
