დღეიდან ახალი სასწავლო წელი დაიწყო. მთელი ქვეყნის მასშტაბით 2 085 საჯარო სკოლა არის გახსნილი და 55 ათასზე მეტი პირველკლასელისთვის ცხოვრების ერთ-ერთი მნიშვნელოვანი ეტაპი დაიწყო. პირველკლასელებს სახელმძღვანელოები და პირადი კომპიუტერები გადაეცათ.
მოსწავლეები 2023-2024 სასწავლო წელს სიახლეებით ხვდებიან. პირველ და მეორე კლასელთათვის ჭადრაკი სავალდებულო საგანი იქნება. ასევე ფართოვდება საგანმანათლებლო პროექტი „სამხედრო საქმე“, რომელსაც უფროსკლასელები შეისწავლიან.
მოსწავლეებს სასწავლო წლის დაწყება მიულოცა განათლების მინისტრმა, გიორგი ამილახვარმა.
„დღეს 15 სექტემბერია და მთელი ქვეყნის მასშტაბით სკოლებში ახალ სასწავლო წელს ვიწყებთ. მინდა, ეს მნიშვნელოვანი თარიღი განსაკუთრებით მივულოცო ჩვენს პირველკლასელებს, რომლებიც წელს პირველად შეაღებენ სკოლის კარებს. ვულოცავ მოსწავლეებს, მშობლებს, ჩვენს მასწავლებლებს და წარმატებულ სასწავლო წელს ვუსურვებ.
ყველა პირველკლასელს სკოლაში საინტერესო, დაუვიწყარი და თავგადასავლებით სავსე წლების გატარებას ვუსურვებ. პირადად მე, როგორც განათლებისა და მეცნიერების მინისტრი, სრულად ვაცნობიერებ ჩემს პასუხისმგებლობას და ყველაფერს გავაკეთებ, რომ სკოლებში უზრუნველყოფილი იყოს ჯანსაღი საგანმანათლებლო გარემო და თითოეულმა მოსწავლემ, ცოდნასთან ერთად, მიიღოს ღირებული ცხოვრებისეული გამოცდილება.
მე და ჩემმა გუნდმა ზოგადი განათლების განვითარების კუთხით აქტიურად დავიწყეთ მუშაობა. ჩვენს ერთ-ერთი უმთავრეს პრიორიტეტს სწორედ სკოლების გაუმჯობესებაზე ზრუნვა, მათ შორის, მოსწავლეზე ორიენტირებული სასწავლო პროცესის ხელშეწყობა, მასწავლებლების მხარდაჭერა და მათი დაფასება წარმოადგენს.
მჯერა, ერთობლივი ძალისხმევით ყველა გამოწვევას დავძლევთ და ჩვენს შვილებს შევუქმნით კიდევ უფრო უკეთეს საგანმანათლებლო გარემოსა და ინფრასტრუქტურას, სადაც გააგრძელებენ ხარისხიანი განათლების მიღებას“,- აცხადებს გიორგი ამილახვარი.
