ბაქოში 23-წლამდელთა ევროპის ჩემპიონატზე საქართველოს თავისუფალი სტილით მოჭიდავეთა ნაკრებმა ერთი ვერცხლისა და ოთხი ბრინჯაოს მედალი მოიპოვა.
ევროპის ვიცე-ჩემპიონი სოლომონ მანაშვილი (125 კგ) გახდა, რომელმაც ფინალი ბულგარეთის სახელით მოასპარეზე ალენ ხუბულოვთან ანგარიშით 5:6 დათმო.
ბრინჯაოს მედლები ლუკა ღვინჯილიამ (57 კგ), დავით ფაცინაშვილმა (70 კგ), ლუკა ჩხიტუნიძემ (74 კგ) და მერაბ სულეიმანიშვილმა (97 კგ) მოიპოვეს. აღსანიშნავია, რომ ლუკა ღვინჯილია და დავით ფაცინაშვილი კონტინენტის პირველობის მესამეადგილოსნები ზედიზედ მეორედ გახდნენ.
შეგახსენებთ, რომ კონტინენტის პირველობაზე საქართველოს ბერძნულ-რომაული სტილით მოჭიდავე 23-წლამდელთა ნაკრებმა ორი ოქროს, ერთი ვერცხლისა და ორი ბრინჯაოს მედალი მოიპოვა და გუნდურ ჩათვლაში მეორე ადგილი დაიკავა.
ქართველი მოჭიდავეები ევროპის ჩემპიონატზე საქართველოს კულტურისა და სპორტის სამინისტროს მხარდაჭერით იმყოფებოდნენ.
