გენდერული თანასწორობის მუდმივმოქმედმა საპარლამენტო საბჭომ სამინისტროების წარმომადგენლებთან საკოორდინაციო შეხვედრა გამართა, სადაც ქალთა ეკონომიკური გაძლიერების სახელმწიფო კონცეფციის შესრულების მონიტორინგის შედეგები განიხილეს.
შეხვედრის მონაწილეებმა მოისმინეს სხვადასხვა უწყების ინფორმაცია კონცეფციის შესრულების მონიტორინგის თაობაზე და მთავარ მიგნებებსა და რეკომენდაციებზე იმსჯელეს.
როგორც პარლამენტის თავმჯდომარის მოადგილემ, გენდერული თანასწორობის მუდმივმოქმედი საპარლამენტო საბჭოს თავმჯდომარემ, ნინო წილოსანმა შეხვედრის დასრულების შემდეგ განაცხადა, აღნიშნულ საკითხთან დაკავშირებით შემდგომი რეაგირებისთვის, საბჭო ახალ დოკუმენტს მოამზადებს.
„ქალთა ეკონომიკური გაძლიერება ჩვენი პრიორიტეტების სათავეშია. დღევანდელ შეხვედრას ყველა სამინისტროდან ის პასუხისმგებელი პირები ესწრებოდნენ, რომლებმაც სამოქმედო გეგმებსა და პროგრამებში ქალთა ეკონომიკური გაძლიერებისთვის გაცემული ჩვენი რეკომენდაციები უნდა გაითვალისწინონ. აღსანიშნავია, რომ ძალიან დიდი პროგრესია ქალთა ეკონომიკური გაძლიერების კუთხით განხორციელებულ პროგრამებში, პროექტებსა და აქტივობებში. ეს ყველაფერი და მათ შორის დღეს განხილული რეკომენდაციები, ის გამოწვევები, რაც დარჩენილია, თავს მოიყრის გენდერული საბჭოს ახალ დოკუმენტში, რომელიც შემდგომი მოქმედებისთვის მომდევნო მოწვევის პარლამენტის გენდერული თანასწორობის საბჭოს გადაეცემა, რომელსაც ექნება კარგი სახელმძღვანელო რა კეთდება და ასევე, სად შეიძლება უფრო მეტის გაკეთება“, – განაცხადა ნინო წილოსანმა.
