პარიზში ზაფხულის მე-17 პარალიმპიური თამაშები ოფიციალურად გაიხსნა.
გახსნის საზეიმო ცერემონიაზე საქართველოს პარალიმპიური დელეგაციის მედროშე პარაწოლჭიმელი, ევროპის მოქმედი ჩემპიონი აკაკი ჯინჭარაძე იყო.
საქართველოს პარალიმპიური ნაკრები პარიზის ზაფხულის მე-17 პარალიმპიურ თამაშებზე ისტორიაში პირველად სპორტის ექვს სახეობაში 14 პარაათლეტით იასპარეზებს. ესენი არიან:
ეტლით მოფარიკავეები ირმა ხეცურიანი და ნინა თიბილაშვილი; პარამძლეოსნები გიორგი ოჩხიკიძე (ბირთვის კვრა) და დავით ქავთარაძე (სიგრძეზე ხტომა); პარატაეკვონდოისტები ანა ჯაფარიძე (-54 კგ), ლია ჩაჩიბაია (-47 კგ), გიორგი ნიკოლაძე (-70 კგ); პარამსროლელი ვლადიმერ ჭინჭარაული (შაშხანით სროლა R4 და R5 კატეგორიებში 10 მეტრზე და R9 კატეგორიაში 50 მეტრზე); პარაძიუდოისტები: ზურაბ ზურაბიანი (-60 კგ), გიორგი ქალდანი (-73 კგ), ინა ქალდანი (+70 კგ), ლაშა ყიზილაშვილი (-90 კგ), რევაზ ჩიკოიძე (+90 კგ); პარაწოლჭიმელი აკაკი ჯინჭარაძე (+107 კგ).
პარალიმპიადის გახსნის ცერემონიას საქართველოს კულტურისა და სპორტის მინისტრის მოადგილე ნიკოლოზ აზნაურაშვილი ესწრებოდა.
პარიზის ზაფხულის პარალიმპიურ თამაშებზე 4 400 სპორტსმენი 22 სპორტის სახეობაში იასპარეზებს.
ინფორმაციისთვის: საქართველოს მთავრობა პარალიმპიური თამაშების ჩემპიონს – 1 000 000 ლარს, ვერცხლისმედალოსანს – 500 000 ლარს, ხოლო ბრინჯაოს პრიზიორს – 250 000 ლარს გადასცემს.
