ქართველი სპორტსმენი თემურ სამხარაძე მსოფლიოს ჩემპიონატიდან სამშობლოში მოპოვებული ოთხი ოქროს მედლით დაბრუნდა

საქართველოს კულტურისა და სპორტის სამინისტროს მხარდაჭერით ქართველმა სპორტსმენებმა ჭაბუკებსა და ახალგაზრდებს შორის მალტაში გამართულ ძალისმიერი სამჭიდის მსოფლიოს ჩემპიონატზე მიიღეს მონაწილეობა. მსოფლიოს პირველობიდან თემურ სამხარაძე მოპოვებული ოთხი ოქროს მედლით დაბრუნდა.

წარმატება ქართველ სპორტსმენს საქართველოს კულტურისა და სპორტის მინისტრის მოადგილე კობა ხუბუნაიამ მიულოცა. სპორტსმენს ელოდნენ გულშემატკივრები და ახლობლებიც.

მსოფლიოს პირველობაზე თემურ სამხარაძემ სამჭიდის ჯამში 1043,5 კგ დააფიქსირა და ოქროს მედალი მოიპოვა. ქართველმა სპორტსმენმა ჩაჯდომში 390 კგ, წოლჭიმში 242,5 კგ, ამოწევაში კი 411 კგ დაძლია და სამივე მოძრაობაშიც ოქროს მედლებს დაეუფლა. თემო სამხარაძემ ამოწევაში როგორც დიდებში, ასევე ახალგაზრდებში ევროპისა და მსოფლიოს ოთხი რეკორდი დაამყარა.

შეგახსენებთ, რომ მსოფლიოს ჩემპიონატზე ჭაბუკებს შორის გიორგი გელაშვილმა ჩაჯდომში 160 კგ, წოლჭიმში 130 კგ და ამოწევაში 190 კგ დააფიქსირა. მან ჩაჯდომში ვერცხლის მედალი მოიპოვა, წოლჭიმში სამი მსოფლიოს რეკორდი დაამყარა და აქაც ვერცხლის მედალი მოიპოვა, ამოწევაში კი ბრინჯაოს მედალს დასჯერდა. ახალგაზრდებს შორის ანდრია მიქაუტაძემ ჩაჯდომში 155 კგ დააფიქსირა და ბრინჯაოს მედალი მოიპოვა, ამოწევაში 195 კგ-ით კი ოქროს მედალი დაიმსახურა.