26 ოქტომბრის საპარლამენტო არჩევნების შედეგების საპროტესტო აქციაზე საქართველოს პრეზიდენტმა სალომე ზურაბიშვილმა თქვა, რომ ფიცს დებს საქართველოს ძველი და მოქმედი სახელმწიფო დროშების წინაშე, რომ ხალხთან ერთად იქნება ბოლომდე.
„თქვენ აქ ვინც ხართ, თქვენ არ წაგიგიათ არჩევნები, თქვენი ხმა მოიპარეს და სცადეს, რომ თქვენი მომავალიც მოიპარონ, მაგრამ ამის უფლება არავის აქვს და თქვენ ამის უფლებას არავის არ მისცეთ. აქ არის ის დროშა, რითაც საქართველომ პირველად გამოაცხადა თანამედროვე ეპოქაში თავისუფლება და დამოუკიდებლობა, ეს არის ის დროშა, რომლის გაგრძელება არის დღევანდელი ჩვენი დროშა. ორივე დროშის წინაშე მე შემიძლია ფიცი დავდო, რომ თქვენთან ერთად ვიქნები ბოლომდე… სანამ არ მივაღწევთ იმ ევროპის კარებთან, რომელიც არის ჩვენი ნამდვილი ოცნება კი არა, რეალობა. მომავალი სხვა ჩვენ არ გვაქვს, არც ალტერნატივა და არც არაფერი სხვა არ გვინდა დავუტოვოთ ამ ქვეყანას თავისი შემდეგი თაობებისთვის – დამოუკიდებლობა, თავისუფლება, ევროპულობა და ეს ქართული იდენტობა, რომელიც მოგვყვება და რომელიც არის ესოდენ ძვირფასი“, – განაცხადა პრეზიდენტმა.
ზურაბიშვილმა თქვა, რომ უცხოურ მედიებს მისცა ინტერვიუები და ესაუბრა ექვს პრეზიდენტს, მათ შორის, ევროპული ქვეყნების პრეზიდენტებს, ასევე, საგარეო საქმეთა მინისტრებს. პრეზიდენტის შეფასებით, მკაფიო განცხადება ჰქონდა აშშ-ის სახელმწიფო მდივანს.
როგორც პრეზიდენტმა განაცხადა, ერთი გამონაკლისის გარდა, არავინ აღიარებს არჩევნების შედეგებს.
„გარდა იმ ერთი ადამიანისა, რომელმაც აქ ჩაიარა (უნგრეთის პრემიერ-მინისტრმა ვიქტორ ორბანმა) არავინ არ აღიარებს ამ არჩევნებს, მაგრამ ყველა გვეუბნება, რომ ჩვენ უნდა გავაგრძელოთ გამოძიება და ბოლომდე მივიყვანოთ. სხვათა შორის, შეიძლება, ამაში მივიღოთ საერთაშორისო მხარდაჭერა, რომ ეს გამოძიება იყოს სრულყოფილი და არ დავტოვოთ არც ერთი კითხვა პასუხის გარეშე“, – განაცხადქ პრეზიდენტმა.
რუსთაველის გამზირზე აქცია საქართველოს პრეზიდენტის ინიციატივით მიმდინარეობს. ის ოთხ ოპოზიციურ პარტიასთან ერთად არ აღიარებს საპარლამენტო არჩევნების წინასწარ შედეგებს.
