რუსთავში, გარემოს დაცვისა და სოფლის მეურნეობის სამინისტროს პროგრამის- „გარემოსდაცვითი და აგრარული განათლება სკოლაში“ ფარგლებში, ქვემო ქართლის სკოლების პედაგოგებთან შეხვედრა გაიმართა.
შეხვედრაზე, გარემოს დაცვის და სოფლის მეურნეობის მინისტრის მოადგილე სოლომონ პავლიაშვილმა, რუსთავის მერმა ნინო ლაცაბიძემ და სახელმწიფო რწმინებულმა ქვემო ქართლში გიორგი დოხტურიშვილმა, დაწყებითი საფეხურის იმ მასწავლებლებს, რომლებმაც გარემოს დაცვის და აგრარული მიმართულებით, სპეციალური ტრენინგ-კურსი გაიარეს, სერთიფიკატები და სპეციალური სახელმძღვანელოები გადასცეს.
გარემოს დაცვის და სოფლის მეურნეობის სამინისტროს ,,გარემოსდაცვითი ინფორმაციისა და განათლების ცენტრი’’, უკვე მეოთხე წელია ახორციელებს პროგრამას-,,გარემოსდაცვითი და აგრარული განათლება სკოლაში’’, რომლის მიზანიც, გარემოსდაცვითი და აგრარული განათლების სკოლებში შეტანა და დეფიციტური პროფესიებით ახალგაზრდების დაინტერესებაა.
პროგრამის ფარგლებში, დაწყებითი საფეხურის პედაგოგებს, 20 საათიანი ტრენინგი უტარდებათ. ცენტრმა, დამხმარე სახელმძღვანელოების კრებულიც გამოსცა, რომელიც დაწყებითი საფეხურის მოსწავლეებს, გარემოს დაცვის და აგრარულ საკითხებში საბაზისო ცოდნის მიღებაში დაეხმარებათ. სახელმძღვანელო, პროგრამის მიხედვით გადამზადებულ პედაგოგებს, სერთიფიკატებთან ერთად საჩუქრად გადაეცემათ.
პროგრამის ფარგლებში, დაწყებითი კლასის 7000-ზე მეტი მასწავლებელი, უკვე გადამზადებულია.
პედაგოგების გადამზადების პროცესი აქტიურად მიმდინარეობს.
