“ლეიბორისტული პარტიის” ოფისში ოპოზიციის შეხვედრა დასრულდა

“ლეიბორისტული პარტიის” ოფისში ოპოზიციის შეხვედრა დასრულდა.

“სტრატეგია აღმაშენებლის” წევრის, პაატა მანჯგალაძის განცხადებით, ოპოზიცია ერთიანია საკითხში, რომ ხელისუფლებას მოლაპარაკებების ჩაშლის საფუძველი არ მიეცეს.

“იმ ჩანაწერების გამოქვეყნების შემდეგ, ნორმალურ ქვეყანაში, არამარტო მოლაპარაკების პროცესიდან, არამედ პრემიერ-მინისტრობიდან გადააყენებდნენ პრემიერ-მინისტრს, მაგრამ იმ ვითარებაში, რომელშიც ჩვენ ვართ დღეს, ჩვენი პოზიციაა, რომ ხელისუფლებას არ უნდა მივცეთ დამატებითი მიზეზი მოლაპარაკების ჩაშლის.

მთავარია, შედეგი და პოლიტიკური კრიზისის განმუხტვის საშუალება არის ვადამდელი არჩევნები. ამ რეალობაში, რომ ხელისუფლებას არ უნდა მივცეთ დამატებითი მიზეზი მოლაპარაკების ჩაშლისთვის, ყველა პარტია ერთიანია. სასურველია, რომ ღარიბაშვილი არათუ მოლაპარაკების პროცესში, არამედ საერთოდ არ იყოს პრემიერ-მინისტრი, მაგრამ იმ რეალობაში, რომელშიც ვცხოვრობთ აუცილებელია კრიზისიდან გამოსავლის პოვნა.

იმ საკითხების გარდა, რომელიც იყო მოლაპარაკების მაგიდასთან, იმ 6 პუნქტის გარდა, სხვა პირობას მოლაპარაკების ჩაშლისთვის არ დავაყენებთ,”-განაცხადა პაატა მანჯგალაძემ.

შეგახსენებთ, რომ “ლეიბორისტული პარტიის” ოფისში ოპოზიციის ერთიანი სხდომა მიმდინარეობდა.

ოპოზიციონერი პოლიტიკოსები აცხადებდნენ, რომ სხდომაზე პრემიერ-მინისტრის მოლაპარაკებების პროცესიდან ჩამოშორების და სხვა კადრით ჩანაცვლების საკითხი განიხილებოდა.

საკითხის განხილვის მიზეზი გავრცელებული ფარული აუდიოჩანაწერი გახდა.