“მგონია, რომ გალაკტიონმა ჩვენთვის დაწერა, გათენდა, შეერთდით, შეერთდით, შეერთდით”

ახლა რომ გიყურებთ, მგონია, რომ გალაკტიონმა ჩვენთვის დაწერა ის ცნობილი სტრიქონები: გათენდა, შეერთდით, შეერთდით, შეერთდით, დროშები, დროშები, დროშები ჩქარა, – ასე მიმართა სიტყვით გამოსვლისას „ლეიბორისტული პარტიის“ ლიდერმა შალვა ნათელაშვილმა რიყის პარკში, ოპოზიციის აქციაზე შეკრებილ ხალხს.

„მოლაპარაკებებით, ჩხირკედელაობით, პროექტების შეცვლით, ხელშეკრულებების მრავალნაირობით ჯერჯერობით ბევრი არაფერი გამოვიდა, ამიტომ არ ვაპირებთ მხოლოდ ამ მიმართულებით სიარულს და სახალხო-საპროტესტო მოძრაობა, რომელიც წინ გველოდება დაწერს რეალურად საქართველოს ისტორიას.

100 მეტრში, თავის დროზე 100 ათასმა თბილისელმა გაწირა სიცოცხლე ჯალალედინის ბრძანებით, არ გადააბიჯა დაგდებულ, დაბლა ჩამოგდებულ სიონის ქონგურს და დაასრულეს სიცოცხლე ისე, რომ მათი დანატოვარი სიდიადე დღემდე ჩვენს გულებს ათბობს და მომავალს გვინათებს. დღევანდელმა ოპოზიციამ და აქ არის ოპოზიციური ელიტა წარმოდგენილი, ჩვენც ისეთი კვალი უნდა დავტოვოთ ჩვენი პრინციპულობით, უკან დაუხევლობით მომავალი თაობისთვის, რომ ათასი წლის შემდეგ ჩვენს შვილთაშვილებს გული გაუნათდეთ ჩვენს გახსენებაზე.

ნებისმიერი გადაწყვეტილება, ეს კარგად ესმის ჩვენს კოლეგებს, რომელიც შეიძლება, იქნას მიღებული დღეს, უნდა იყოს გათვლილი საუკუნეებზე, რადგან არასოდეს საქართველოში აღარ დავუშვებთ იმას, რომ არჩევნებს აყალბებდნენ, ძალაუფლების უზურპაცია ხდებოდეს და ვიყოთ ცხვრებივით გაჩუმებული, უცხოელი დამკვირვებლები წერდნენ დასკვნებს, რომ კი იყო რაღაც დარღვევები, მაგრამ არჩევნები მაინც ლეგიტიმურია. თუ დარღვევები იყო, როგორ არის ლეგიტიმური. თუ ადამიანს კორონავირუსი აქვს, როგორ არის ის ჯანმრთელი. ეს ხომ ეწინააღმდეგება ლოგიკას. ალბათ ყველას გვახსოვს, მეგობარი ელჩის განცხადება, სულ ყალბდებოდა თქვენთან არჩევნები და რა გეტაკათ ახლა ასეთიო. ახლა ყველას ვეუბნებით, ეს აღარ მოხდება, ამას აღარ დავუშვებთ. ვიჩქაროთ ნელა და აუცილებლად დამთავრდება საქართველოს გამარჯვებით“, – განაცხადა შალვა ნათელაშვილმა.