დღეს ვართ პიკურ პერიოდში, რასაც ჩვენ აღვნიშნავდით, რომ აპრილის ბოლოდან მაისის პირველი ორი კვირა, ცოტა მეტი, შეიძლებოდა ყოფილიყო პიკური პერიოდი, რომლის შემდეგაც უნდა დაიწყოს დაღმასვლა, – ამის შესახებ დაავადებათა კონტროლის ეროვნული ცენტრის ხელმძღვანელმა ამირან გამყრელიძემ ბრიფინგზე განაცხადა.
გამყრელიძის განცხადებით, ჯერჯერობით ქვეყანაში მოქმედი შეზღუდვების დამატებით შემსუბუქებაზე ამ ეტაპზე საუბარი არ არის.
„სასიამოვნოა, რომ ბოლო მონაცემებით, პირბადის ტარების მაჩვენებელი 76 პროცენტზე დაფიქსირდა, რაც იდეალური არ არის, მაგრამ ბევრად მეტია, რაც აპრილის დასაწყისში იყო. ადამიანები მეტად ხმარობენ პირბადეს, რომელიც ყველაზე კარგი დაცვის საშუალებაა. სწორედ ამიტომ, ჯერჯერობით საუბარი არ არის სხვა შეზღუდვის შემსუბუქებაზე, რადგან ჩვენ პიკში ვართ. ასევე, სამწუხაროდ, დღეს დეკემბრის შემდეგ ყველაზე მაღალი ციფრი გვქონდა სიკვდილობის, ამასაც ვამბობდით. ბევრი პარამეტრით, პროგნოზირება უმადურია, მაგრამ გარკვეული პარამეტრების მიხედვით, ვფიქრობთ, ვართ პიკში და ყველაფერს ისე თუ დავიცავთ, რომ ძალიან არ გავლაღდებით, ალბათ ორი კვირის ფარგლებში ინფექციამ თანდათან უკუსვლა უნდა დაიწყოს“, – განაცხადა ამირან გამყრელიძემ.
