მამაკაცს, რომელიც ყოფილი ცოლის ოჯახს თავს დაესხა, ცოლი და სიმამრი მოკლა, სიდედრი და ცოლის ძმა კი დაჭრა, პროკურატურამ ბრალი წარუდგინა. უწყებამ ბრალი წარუდგინა ასევე, ორ პირს, რომლებიც ანგარიშსწორების მიზნით, მკვლელობისთვის დაკავებული მამაკაცის სახლში მივიდნენ და მის ოჯახის წევრს ფიზიკურად გაუსწორდნენ.
მკვლელობის ფაქტზე დაკავებულ მამაკაცს, ბრალად ედება გენდერის ნიშნით შეუწყნარებლობის მოტივით ჩადენილი განზრახ მკვლელობა და განზრახ მკვლელობის მცდელობა, ასევე ცეცხლსასროლი იარაღის და საბრძოლო მასალის უკანონო ტარება. ორ პირს, რომლებიც დაკავებული მამაკაცის ოჯახს გაუსწორდნენ, პროკურატურამ ბრალი ჯანმრთელობის განზრახ მძიმე დაზიანების და სხვისი ნივთის დაზიანებისთვის წარუდგინა. სოფელ ზემო სარალში მკვლელობა გუშინ მოხდა.
“საქართველოს შინაგან საქმეთა სამინისტროს მიერ ჩატარებული გამოძიებით დადგინდა, რომ 2021 წლის 20 ივლისს, მარნეულის მუნიციპალიტეტის სოფელ ზემო სარალში ე.ა-მ, შერიგებაზე უარის გამო შურისძიების მიზნით, გენდერის ნიშნით შეუწყნარებლობის მოტივით, ცეცხლსასროლი იარაღიდან ყოფილი მეუღლის – გ.პ.-ს, მეუღლის ძმის – ა.პ.-ს, მეუღლის მამის – ი.პ.-ს და დედის – ს.ა.-ს მიმართულებით, დამიზნებით, რამდენიმე გასროლა განახორციელა და შემთხვევის ადგილიდან მიიმალა.
სროლის შედეგად, გ.პ.-მ და ი.პ.-მ სიცოცხლისთვის შეუთავსებელი დაზიანებები მიიღეს და საავადმყოფოში მიყვანამდე გარდაიცვალნენ. ხოლო ს.ა. და ა.პ. დროულად გაწეული სამედიცინო დახმარების შედეგად სიკვდილს გადაურჩნენ.
გამოძიებით ასევე დადგინდა, რომ მომხდარი დანაშაულის შემდეგ, გარდაცვლილების ნათესავები ტ.პ. და ი.პ. სხვა პირებთან ერთად მივიდნენ ე.ა.-ს საცხოვრებელ სახლში, რა დროსაც ტ.პ.-მ შურისძიების მიზნით, ე.ა.-ს მამას ზ.ა.-ს სიცოცხლისთვის სახიფათო მძიმე ხარისხის დაზიანება მიაყენა, ხოლო ი.პ.-მ ეზოში გაჩერებული ორი ავტომანქანა დააზიანა.”,- წერია უწყების განცახდებაში.
სამართალდამცველებმა ე.ა., ტ.პ. და ი.პ. იმავე დღეს დააკავეს. ე.ა.-ს ბრალდება საქართველოს სისხლის სამართლის კოდექსის 109-ე მუხლის მე-2 ნაწილის „დ1“ (განზრახ მკვლელობა გენდერის ნიშნით) და „ვ“ (განზრახ მკვლელობა ოჯახის წევრის მიმართ) ქვეპუნქტებით, მე-3 ნაწილის „ა“ ქვეპუნქტით (ორი ან მეტი პირის განზრახ მკვლელობა), 19, 109-ე მუხლის მე-2 ნაწილის „დ1“ (განზრახ მკვლელობის მცდელობა გენდერის ნიშნით) და „ვ“ (განზრახ მკვლელობის მცდელობა ოჯახის წევრის მიმართ) ქვეპუნქტებით, მე-3 ნაწილის „ა“ ქვეპუნქტით (ორი ან მეტი პირის განზრახ მკვლელობის მცდელობა) და 236-ე მუხლის მე-4 ნაწილით (ცეცხლსასროლი იარაღისა და საბრძოლო მასალის მართლსაწინააღმდეგო ტარება) წარედგინა რაც სასჯელის სახით 16 წლიდან 20 წლამდე ან უვადო თავისუფლების აღკვეთას ითვალისწინებს.
ტ.პ.-ს ბრალდება სისხლის სამართლის კოდექსის 117-ე მუხლის პირველი ნაწილით (ჯანმრთელობის განზრახ მძიმე დაზიანება) წარედგინა, რაც სასჯელის სახედ და ზომად 3-დან 6 წლამდე თავისუფლების აღკვეთას ითვალისწინებს, ხოლო ი.პ.-ს 187-ე მუხლის პირველი ნაწილით (სხვისი ნივთის დაზიანება) წარედგინა ბრალდება, რაც ერთიდან სამ წლამდე თავისუფლების აღკვეთას ითვალისწინებს. პროკურატურა ბრალდებულებისთვის აღკვეთის ღონისძიების შეფარდების შუამდგომლობით სასამართლოს კანონით დადგენილ ვადაში მიმართავს.”-ნათქვამია უწყების მიერ გავრცელებულ ინფორმაციაში.
ცნობისთვის, საზარელი მკვლელობა მარნეულის სოფელ ზემო სარალში გუშინ გვიან ღამით მოხდა. მას შემდეგ, რაც მამაკაცმა ყოფილი ცოლი და სიმამრი მოკლა, და ყოფილი სიდედრი და ცოლისძმა ცეცხლსასროლი იარაღიდან დაჭრა, მოკლულების ნათესავებმა შურისძიება გადაწყვიტეს. რამდენიმე კაცი მივიდა სავარუდო მკვლელის ოჯახში, ნიჩბით სცემეს ბრალდებულის მამა, და დაამტვრიეს ავტომობილი.
