ბოლნისის მუნიციპალიტეტის მერიაში, ბოლნისის კულტურისა და დასვენების პარკში მდებარე ყოფილი კინოკლუბის შენობის აღდგენის კონცეფციის საჯარო განხილვა გაიმართა.
ამორტიზებული შენობის დემონტაჟისა და შემდგომ მისი აღდგენის კონცეფციის საჯარო განხილვა, გერმანიის საერთაშორისო თანამშრომლობის საზოგადოების, GIZ-ის პროგრამის „კარგი მმართველობა ადგილობრივი განვითარებისთვის” ფარგლებში მოეწყო.
კონცეფცია მერიის მიერ დაქირავებულმა კონსულტანტებმა შეიმუშავეს. აღნიშნული დოკუმენტის მიზანს წარმოადგენს განსაზღვროს ყოფილი კინოკლუბის შენობის მომავალი დანიშნულება და მისი არქიტექტურული იერსახე.
შეხვედრას ადგილობრივი თვითმმართველობის წარმომადგენლები, ახალგაზრდები და მოქალაქეები ესწრებოდნენ.
„ბოლნისის კულტურისა და დასვენების პარკში მდებარე ყოფილი კინოკლუბის ამორტიზირებული შენობა სამომავლოდ ახალ სიცოცხლეს დაიბრუნებს. ამ მნიშვნელოვანი პროექტის განხორციელებაში გერმანიის საერთაშორისო თანამშრომლობის საზოგადოება გვეხმარება, რისთვისაც ორგანიზაციას დიდ მადლობას ვუხდი. შენობის არქიტექტურული იერსახისა და მისი მომავალი ფუნქციის შესახებ კონცეფცია დარგის სპეციალისტებმა შეიმუშავეს და ის საზოგადოებასა და დაინტერესებულ მხარეებს წარუდგინეს. აღსანიშნავია, რომ GIZ-ის პროგრამის დახმარებით, სოფელ ჯავშანიანში არსებული ყოფილი სკოლის დემონტაჟიც მოხდება და შენობა აღდგენის შემდეგ, სოფლისთვის საჭირო ფუნქციას შეიძენს“, – განაცხადა ბოლნისის მუნიციპალიტეტის მერმა დავით შერაზადიშვილმა.
