იოსელიანი: ოცნებამ წინა ხელისუფლებისგან ბევრი ცუდი იმემკვიდრევა

პარტია „მოქალაქეების“ ერთ-ერთი ლიდერი ლევან იოსელიანი მიიჩნევს, რომ ტელეკომპანია „პირველის“ მიერ გამოქვეყნებული ფარული ჩანაწერების თაობაზე პროკურატურას გამოძიება უნდა დაეწყო.

როგორც ის სოციალურ ქსელ „ფეისბუქზე“ წერს, თუ ჩანაწერის ავთენტურობა დასტუდება, ყველა ფიგურანტმა თანამდებობა უნდა დატოვოს.

“ჩვენ რომ ნორმალურ ქვეყანაში ვცხოვრობდეთ, პროკურატურას გამოძიება უნდა ჰქონდეს უკვე დაწყებული ჩანაწერებთან დაკავშირებით, მაგრამ ვიცით, რომ არც პროკურატურა და არც სასამართლო პოლიტიკური გავლენებისგან თავისუფალი არაა და შესაბამისად, ამის მოლოდინიც არ გვაქვს.

“ქართულმა ოცნებამ” წინა ხელისუფლებისგან ბევრი ცუდი რომ იმემკვიდრევა, ამაზე კამათი მგონი უკვე ზედმეტიცაა, ეს უკანონო მიყურადების პრაქტიკაც ისე გადაიბარა, როგორც ბევრი სხვა ცუდი რამ. ამიტომ, არ მიკვირს ახლა, რომ ერთმანეთს სწორედ ამ ბინძური მეთოდებით ებრძვიან,

მაგრამ მიუხედავად ყველაფრისა, პირველ რიგში, უნდა დადასტურდეს, რომ ეს ჩანაწერები ავთენტურია ან ფაბრიკაციაა, ეს უნდა დაადასტუროს ავტორიტეტულმა საერთშორისო ექსპერტიზამ, რაც უფრო მალე გააკეთებს ამას ხელისუფლება, მით უკეთესი იქნება მათთვის, თუ არ გააკეთებენ, ჩაითვლება, რომ ნამდვილია და მაშინ ჩანაწერის ყველა ფიგურანტმა უნდა დატოვოს შესაბამისი თანამდებობები, ისინი უნდა გადადგნენ, რადგან ჩანაწერები კონკრეტულ სისხლის სამართლის დანაშაულის ნიშნებს შეიცავს.

და ბოლოს, ჩემდა სამწუხაროდ, ამ ქვეყნის უბედურება ისაა, რომ არ არსებობს მანკიერება, რასაც „ქართული ოცნება“ ჩაიდენს და არ აღმოჩნდეს, რომ წინა ხელისუფლებას ჩადენილი არ ჰქონოდეს, და პირიქით…“,-წერს ლევან იოსელიანი სოციალურ ქსელში.

ცნობისთვის, “ტვ პირველის” ინფორმაციით, მათ მოიპოვეს ფარული აუდიო ჩანაწერი, რომლითაც, მათივე მტკიცებით, ბერა ივანიშვილი ირაკლი ღარიბაშვილთან ერთად არასასურველი კომენტარების გამო, რამდენიმე პირის, მათ შორის ბავშვის დასჯას უკვეთავს.